Minisitiri w’Ububanyi n’Amahanga n’Ubutwererane w’u Rwanda, Amb. Olivier J.P. Nduhungirehe, yasoje uruzinduko rw’akazi yagiriraga muri Afurika y’Epfo, aho yari yarutumiwemo na Minisitiri ushinzwe Umubano Mpuzamahanga n’Ubutwererane wa Afurika y’Epfo, Ronald O. Lamola.
Uru ruzinduko rwakozwe kuri uyu wa 17 Kamena 2026, rufatwa nk’urwabaye intambwe ikomeye mu gukomeza gusubiza ku murongo no gushimangira umubano hagati y’u Rwanda na Afurika y’Epfo. Aba baminisitiri basuzumye intambwe imaze guterwa binyuze mu biganiro bya dipolomasi bikomeje, bongera kwemeza ubushake buhuriweho bwo kurushaho guteza imbere ubufatanye bugamije inyungu z’ibihugu byombi n’umugabane wa Afurika.
Mu itangazo ryashyizwe ahagaragara kuri uyu wa 18 Kamena 2026, ryagaragaje ko ibintu by’ingenzi byagezweho muri uru ruzinduko ari amasezerano yo kongera gutangiza Komisiyo ihuriweho y’Ubufatanye (Joint Commission of Cooperation – JCC), aho u Rwanda ruzakira inama yayo itaha mu gihembwe cya mbere cya 2027.
Aba baminisitiri banemeranyije kwihutisha ibikorwa bigamije kwagura ubufatanye hagati y’ibihugu byombi, bongera gushimangira ubushake bwo kubaka umubano uhamye w’ejo hazaza ushingiye ku kwizerana no gufatanya ku nyungu rusange.
Bashingiye ku kamaro ko koroshya ingendo, ubucuruzi, ishoramari, ubukerarugendo, ubufatanye mu burezi n’imikoranire hagati y’abaturage b’ibihugu byombi, aba baminisitiri bumvikanye ko mu gihe cy’amezi 12 ari imbere hazasubukurwa itangwa rya viza ku bafite pasiporo zisanzwe z’u Rwanda.
Aba baminisitiri kandi biyemeje kurushaho gushimangira ubufatanye mu bukungu no kongera uruhare rw’abikorera. Banaganiriye ku bibazo by’umutekano n’amahoro mu karere, birimo ibibera mu Burasirazuba bwa Repubulika Iharanira Demokarasi ya Congo, Mozambique, Sudani, Sudani y’Epfo, Somaliya ndetse no mu karere ka Sahel.
Bongeye kandi gushimangira ko bashyigikiye ibisubizo bituruka muri Afurika ubwayo mu gukemura ibibazo byugarije uyu mugabane.
Guverinoma y’u Rwanda yakiriye neza ibyavuye muri uru ruzinduko rw’akazi, kandi itegereje gukomeza gukorana bya hafi na Afurika y’Epfo mu guteza imbere ubufatanye bushya buzamura amahoro, iterambere n’ubwuzuzanye bw’akarere.
