Abaturage bo mu mirenge itatu yo mu Karere ka Ngoma bakoze umuganda usoza ukwezi kwa Mutarama 2026 basana ibice by’umuhanda wari warangiritse cyane w’ibirometero 12.5 bashyiramo urusekabuye(Laterite) kubera ko wabangamiraga imigenderanire.
Uyu muganda wabereye mu Murenge wa Zaza ahahuriye abaturage bo mu bice bya Zaza, Karembo na Mugesera.
Abashinzwe igenagaciro n’ubutaka mu Karere ka Ngoma bavuze ko ibikorwa bakoze kuri uyu muhanda munini wa kirometero 12.5 washyizwemo laterite n’imashine iyitsindagira.
Bahereye uyu muganda mu Murenge ka Karembo ahazwi nko mu byapa bajya Zaza ndetse bakomeza na Mugesera.
Abaganiriye na MUHAZIYACU bagaragaje impungenge bahuraga nazo kubera uyu muhanda wari warangiritse bigaragarira amaso.
Mukarushema Consolée wo mu Murenge wa Karembo, Akagari ka Karaba, mu Mudugudu wa Rusumbantwari, yavuze ko ashimira abatekereje ko hakorwa kuko ngo umuganda usanzwe utari kuzakemura iki kibazo.
Ati “Turashima ko twaje gukora uyu muganda kubera ko harekaga amazi menshi hanyuma kuhanyura ugasanga imodoka, igare na moto hari ibintu byo kugenda nabi, ndetse yahahurira n’umuturage ibiziba na we urabyumva.”
Nzeyimana François wo mu Murenge wa Zaza, ati: “Uyu muhanda wari warangiritse no ku ruhande muri rigori harimo imyanda haruzuye, noneho amazi agaca mu muhanda akawonona ndetse n’isuri ikaza mu mirima yacu.”
Umumotari, Cyubahiro Constantin ukorera muri iyi Murenge itatu, yagize ati: “Uyu muhanda kubera imvura nyinshi yawuguyemo wari warangiritse ariko turashimira ubuyobozi bwadufashije kuko wangizaga moto zacu, amapine asaza buri munsi.”
Umuyobozi wungirije w’Akarere ushinzwe imibereho myiza y’abaturage, Mukayiranga Marie Gloriose yashimiye abaturage bagize uruhare mu gusibura uyu muhanda ndetse n’abafatanyabikorwa babafashije kubona laterite.
Yagize ati “Turabashimira kuko muri uyu muganda twari dufite abaturage bagera hafi ku 1,500 b’imirenge itandukanye barimo abamotari, abanyonzi kandi babikoranye ubushake.”
Visi Meya Mukayiranga yashishikarije abaturage gukomeza gukora isuku ku muhanda cyane abafite isambu zikora ku muhanda bagomora ahasibamye.
Muri uyu muganda hatanzwe ubutumwa butandukanye burimo kugira isuku, kubungabunga ibishanga, ikiganiro ku bikorwa by’intwari, kugira uruhare mu kwicungira umutekano, kwirinda ibiyobyabwenge n’ubundi butandukanye.
