Abaturiye isoko rito rya Kiyovu mu Murenge wa Ndego mu Karere ka Kayonza barishimira ko bubakiwe isoko bemeza ko rizabafasha kurushaho kwihutisha iterambere ryabo.
Aba baturage bavuga ko mu gihe cy’imvura batabonaga uko bacuruza ndetse n’igihe izuba ryaba ryinshi bahuraga n’ibihombo bitewe n’uko ibicuruzwa byabo byangirikaga.
Abaturiye iri soko rya Kiyovu bavuga ko ryaje rikenewe kuko mbere y’uko ryubakwa batabonaga aho kwikinga imvura n’izuba, muri bo uwitwa Nsabimana Pascal yagize ati: “ikibazo cyo kunyagirwa cyo cyari gihari ariko ubu kirakemutse.”
Yakomeje avuga ati: “Ikindi kandi izuba naryo ntabwo ryari ryoroshye, iri soko duhawe tugiye kuribyaza umusaruro turushaho kwihutisha iterambere ryacu n’iry’igihugu muri rusange.”
Nyiransaba Charlotte we avuga ko isoko bubakiwe rigiye gutuma n’abandi batinyuka ubucuruzi.
Ati: “Ni byiza kubona isoko hafi yawe bituma nawe wumva ko ukwiye kuribyaza umusaruro, sinari nsanzwe ncuruza ariko niteguye gukorera hano, ndashimira ubuyobozi buhora buduha ibyiza.”
Umuyobozi w’Akarere ka Kayonza, Nyemazi John Bosco, agira inama abaturage yo kurushaho kunoza imikoreshereze y’ibikorwaremezo bahabwa.
Ati: “Rero ibi bikorwaremezo muhabwa abaturage murasabwa kurushaho kubikoresha neza uko bikwiye kuko muba mubihawe kugira ngo birusheho kwihutisha iterambere ry’umuturage.”
Meya Nyemazi kandi yasabye wihutisha imirimo isigaye kugira ngo abaturage batangire kuhakorera.
Ati: “Imirimo isigaye yarushaho kwihwutishwa kugira ngo abaturage batangire kubyaza umusaruro iri soko.”
Isoko rya Kiyovu rihereye mu Murenge wa Ndego mu Karere ka Kayonza ritwaye amafaranga y’u Rwanda angana na 69,670,592 FRW.
