Abofisiye bakuru bo mu Ngabo z’u Rwanda (RDF), Lt Col Christian Mushengezi na Lt Col John Bosco Kamuhangire, barangije amahugurwa ya gisirikare yamaze amezi 10 mu gihugu cya Qatar.
Aya mahugurwa yasojwe kuri uyu wa 29 Kamena 2026, yatangiwe mu Ishuri Rikuru rya Gisirikare rya Joaan bin Jassim Academy for Defence Studies.
Usibye amasomo ya gisirikare, aba basirikare banarangije kwiga ururimi rw’Icyarabu, bikaba biteganyijwe ko bizabafasha kurushaho kunoza ubufatanye mpuzamahanga mu bya gisirikare.
Umuhango wo gutanga impamyabumenyi wayobowe na Minisitiri w’intebe wungirije akaba n’Umunyamabanga wa Leta ushinzwe Ingabo muri Qatar, Sheikh Saud bin Abdulrahman Al Thani.
Wanitabiriwe n’abayobozi bakuru b’Ingabo za Qatar, Abadipolomate bahagarariye ibihugu byabo ndetse n’abandi bashyitsi b’icyubahiro. U Rwanda rwari ruhagarariwe na Col Bernard Niyomugabo, uhagarariye Igihugu mu bya gisirikare muri Qatar.
U Rwanda na Qatar bisanzwe bifitanye umubano mwiza ushingiye ku bufatanye mu nzego zirimo ishoramari n’umutekano. Muri uwo mubano, abasirikare b’u Rwanda bakomeje koherezwa muri Qatar mu mahugurwa atandukanye, by’umwihariko ajyanye n’ubupilote.
Mu rwego rwo gukomeza gushimangira ubufatanye mu by’umutekano, mu mpera za 2024 Polisi y’u Rwanda n’Urwego rushinzwe Umutekano imbere muri Qatar byashyize umukono ku masezerano y’imikoranire agamije kurwanya ibyaha, gusangira ubunararibonye no guhugurana mu bikorwa byo kubungabunga umutekano.
