Mu itangazo rya Minisiteri y’ubuzima mu Rwanda ry’amakuru mashya kuri Virusi ya Marburg rigaragaza ko kuri iki Cyumweru abandi bantu babiri bitabye Imana bishwe n’iyo virusi, biyongera kuri batandatu bari batangajwe ejo hashize ko bamaze gupfa; mu gihe hakiri abarwaye 18.
Ni amakuru atangajwe kandi nyuma y’uko kuri iki Cyumweru Minisitiri w’ Ubuzima Dr. Nsanzimana Sabin, yatangaje mu kiganiro n’ Abanyamakuru i Kigali, ko abantu bagera kuri 300, aribo bimaze kumenyekana ko bahuye n’abanduye icyorezo cya Marburg.
Ku mugoroba wo kuri uyu wa Gatandatu, tariki 28 Nzeri, nibwo Minisitiri w’ubuzima yari yatangaje ko umubare munini w’abarwaye icyorezo cy’indwara y’umuriro mwinshi iterwa na virusi ya Marburg n’abo yahitanye wiganje mu bakora kwa muganga, cyane cyane ahavurirwa indembe.
Bivugwa ko Virusi ya Marburg yandurira cyane mu gukora ku maraso, amatembabuzi y’uyirwaye cyangwa gusangira ibikoresho, imyambaro, byakoreshejwe n’uyirwaye.
Minisitiri Dr. Nsanzimana yakomeje agira ati: “Uwanduye iyo virusi, bishobora gufata iminsi itatu kugera ku byumweru bitatu ataragaragaza ibimenyetso. Ni indwara igaragaza ubukana bwinshi, ku buryo uwahuye nayo, agira ibyago byinshi byo kuba yamuhitana. Icyakora turi gukora ku buryo hapimwa kare abagaragayeho ubu burwayi bagakurikiranwa kugira ngo twirinde ko hagira abaremba, cyangwa hagira abongera guhitanwa nayo.”
Mu bimenyetso biranga iyi ndwara hari umuriro mwinshi, kubabara umutwe, kuruka, gucibwamo n’ibindi.
Mu byo abaturarwanda basabwa mu kwirinda iki cyorezo harimo kwirinda gusangira ibikoresho, gukaraba intoki n’amazi meza n’isabune ndetse no gukoresha umuti wica udukoko uzwi na ‘Sanitizer’,
Minisiteri y’ubuzima ivuga ko ubufatanye bw’Abanyarwanda n’abandi bafatanyabikorwa bwatumye Igihugu gitsinda ibindi byorezo mu bihe byashize, aribwo buzatuma n’ibindi byorezo biriho ubu bizatsindwa kandi nta we ukwiye gukuka umutima.
Inkuru yabanje: Abantu batandatu bamaze guhitanwa na ‘Marburg’ mu Rwanda
