Icyizere ni cyose ku bahinzi n’aborozi bo mu Ntara y’Iburasirazuba bitabira imurikagurisha mpuzamahanga (expo) riri kubera i Rwamagana, bafite intego ko kubona amakuru ahagije azabafasha guhinga neza igihembwe cy’ihinga cya 2025A ndetse n’amasoko y’umusaruro wabo.
Abaturage barakora ibi kugira ngo barebe bimwe mu bikorwa biri kumurikwa, haba ibyo abandi bagezeho, inyongeramusaruro, ubunararibonye mu kubyaza umusaruro ibiva ku buhinzi n’ubworozi ndetse n’uko ubuhinzi n’ubworozi byakorwa hagamijwe kubona amafaranga.
Ubwo umunyamakuru wa Muhazi Yacu yasuraga ahabera iri murikagurisha i Rwamagana ku munsi waryo wa kabiri, kuri uyu wa 18 Kanama yasanze hari abakiri kwitegura, dore ko iri murika ryaje rikurikirana n’iryo ku rwego rw’igihugu ryarangiye kuya 15 Kanama, naho irya Rwamagana rigatangira kuya 17 Kanama.
Umwe mu baturage bari bitabiriye ni Uwambaje Mwajuma atuye mu Murenge wa Kigabiro mu Karere ka Rwamagana. Uwambaje avuga ko ahinga urutoki mu murenge wa Rubona.
Yagize ati: “Icyanzanye ni ukureba aho abandi bageze bakora, ndi gushaka amakuru y’uburyo abantu bahinga ibitoki kandi bikabona isoko ryiza, nk’ubu twejeje ibitoki ariko kuko ari byinshi igiciro cyaragabanyutse, ndashaka kubona ahari inganda mvugane nazo uko twajya dukorana.”
Muhizi Albert we ari muri koperative ihinga imboga mu Murenge wa Gishari, nawe yemeza ko icyamuzanye ari ugushaka amakuru atandukanye y’uburyo bazagurisha imboga beza kandi ku giciro cyiza.
Umuyobozi w’Urugaga rw’Abikorera mu Ntara y’Iburasirazuba – PSF Nkurunziza Jean de Dieu yemeza ko buri wese uzitabira iri murika azabona amakuru ahagije kandi yamufasha gutera imbere mu byo akora.
Yakomeje agira ati: “Iri murikagurisha rije rikurikira iryo ku rwego rw’igihugu ndetse n’isozwa ry’imurikabikorwa rya 17 ry’ubuhinzi n’ubworozi ku Mulindi, nabo baraje, kudasura iri murika ryacu ni ukunyagwa zigahera kuko abahinzi turitegura igihembwe cy’ihinga, aha rero hari amakuru menshi y’ihinga.”
Nkurunziza yakomeje asaba abaturage kwitabira ku bwinshi kandi bakabona amakuru bifuza dore ko Intara y’Iburasirazuba ifatwa nk’ikigega cy’igihugu mu buhinzi n’ubworozi.
Iri murikagurisha izasozwa ku wa 03 Nzeri, kugeza ubu mu bamurika bagera kuri 300, ubuyobozi bw’iri murika bwemeza ko abagera kuri 90% bamaze kuhagera gusa n’abandi nabo barategerejwe kuko hari abakiri kuza.
