Abafite imishinga ijyanye no kurengera ibidukikije no guhangana n’imihindagurikire y’ikirere bahuriye n’abashoramari, ibigo by’imari n’abaguzi mu Karere ka Rwamagana, mu rwego rwo kubafasha kubona igishoro n’amasoko no kwagura ibikorwa byabo.
Mu gikorwa cya Business-to-Business (B2B) Linkage and Green Finance Marketplace, cyabaye kuri uyu wa 19 Kanama, cyahuje abafite imishinga, abashoramari, ibigo by’imari, amakoperative n’abandi bafatanyabikorwa mu iterambere.
Iki gikorwa cyabaye muri gahunda ya Transforming Eastern Province through Adaptation (TREPA), iterwa inkunga na Green Climate Fund (GCF), ikayoborwa na International Union for Conservation of Nature (IUCN) ku bufatanye na Cordaid Rwanda n’abandi bafatanyabikorwa.
Muri iri huriro herekanwe imishinga 8 ijyanye no kurengera ibidukikije no guhangana n’imihindagurikire y’ikirere. Harimo ubworozi bw’inzuki, ubuhinzi bw’ibihumyo n’urusenda, pepiniyeri z’ibiti, gukora amashyiga arondereza ibicanwa, korora amatungo no gutunganya ibiryo byayo.
Abafite iyi mishinga bahawe umwanya wo kuyimurika no guhura n’abashobora kuyishoramo imari, abaguzi ndetse n’ibigo by’imari, harebwa uburyo yabona ubushobozi bwo kwaguka no kubona amasoko.
Mujawayezu Rachel wo mu Murenge wa Muyumbu mu Karere ka Rwamagana, ni umwe mu bafite umushinga wo guhinga urusenda no kurutunganya kugira ngo rwongere agaciro.
Aganira na MUHAZIYACU yavuze ko TREPA yabafashije kubona ubumenyi mu buhinzi no kwishyira hamwe, ati: “TREPA yabashije kuduhugura ku buhinzi no kwishyira hamwe mu matsinda. Tumaze kwishyira hamwe no kwizigama, nibwo twatangiye guhinga urusenda ndetse no kurwongerera agaciro nk’uko mubibona hariya. Gusa ntiturabona isoko rihagije.”
Mujawayezu avuga ko iri huriro ryabahaye amahirwe yo kwegera ibigo by’imari kugira ngo bashobore kubona amafaranga yo kongera ubushobozi bw’imishinga yabo.
Ati: “TREPA yaduhuje n’ibigo by’imari, tubasha kuba twabona amafaranga adufasha mu buhinzi bwacu.”
Uretse ubuhinzi bw’urusenda, avuga ko TREPA yanabahuguye ku kamaro k’ibiti bivangwa n’imyaka, birimo kurwanya isuri, gufumbira ubutaka no gutanga ibicanwa.
Umuyobozi w’Intara y’Iburasirazuba, Rubingisa Pudence, yavuze ko gahunda ya TREPA iri mu bikorwa bigamije gushaka ibisubizo bihangana n’imihindagurikire y’ikirere, binyuze mu guhuza imbaraga za Leta, abaturage n’abafatanyabikorwa.
Yavuze ko uyu mushinga umaze imyaka ine ukorera mu Ntara y’Iburasirazuba, hakaba hasigaye indi myaka ibiri.
Rubingisa yavuze ko gutera amashyamba n’ibiti bivangwa n’imyaka biri mu bikorwa by’ingenzi mu guhangana n’imihindagurikire y’ikirere, anagaragaza ko abaturage bagomba kubigiramo uruhare.
Ati: “Igisubizo Leta yadushakiye ni uguhuza izo mbaraga n’abandi bafatanyabikorwa, cyane cyane muri gahunda zo gutera amashyamba, duhereye ku mashyamba ya Leta, amashyamba y’abaturage, hakazamo no gutera ibiti bivangwa n’imyaka ndetse n’imbuto.”»
Yavuze ko gahunda yatangiriye ku matsinda mato y’abaturage yahabwaga amahugurwa n’ubumenyi ku bikorwa bigomba gukorwa, mbere yo kubishyira mu bikorwa.
Ubuyobozi bw’Intara y’Iburasirazuba bugaragaza ko hari intego yo gutera ibiti miliyoni 40 mu 2026 no mu 2027, kandi ko pepiniyeri zateguwe muri buri Kagari.
TREPA ifite bagenerwabikorwa barenga 33,000, bibumbiye mu matsinda yo kwizigama arenga 1,300 mu turere turindwi tugize Intara y’Iburasirazuba.
Muri aya matsinda harimo abafite imishinga mito n’iciriritse ikorera mu buhinzi, ubworozi n’ibindi bikorwa bifasha kurengera ibidukikije. Bimwe muri ibyo bikorwa bikenera igishoro, amasoko n’ubumenyi mu micungire y’ubucuruzi kugira ngo bibashe kwaguka.
Ni muri urwo rwego iri huriro ryahuje abafite imishinga n’ibigo by’imari, abashoramari n’abaguzi, kugira ngo bashobore kumvikana ku byo buri ruhande rukeneye no gushaka uburyo imishinga yabona ubushobozi bwo gutera imbere.
Ibigo byagaragaje serivisi z’imari zishobora gufasha imishinga mito n’iciriritse kubona igishoro, mu gihe abafite imishinga bahawe umwanya wo kumenya ibisabwa kugira ngo babashe kubona izo serivisi zitangwa n’ibyo bigo by’imari.
Kuri Mujawayezu uhinga urusenda, kubona igishoro ni ingenzi mu guteza imbere umushinga we, ariko kubona isoko rihagije na byo bikomeje kuba icyifuzo gikomeye.
Ihuriro ryagaragaje ko guhuza abafite imishinga n’abashoramari, abaguzi n’ibigo by’imari bishobora gufasha imishinga mito n’iciriritse gukemura ibibazo byo kubona igishoro n’amasoko, ari nako ikomeza kugira uruhare mu kurengera ibidukikije no guhangana n’imihindagurikire y’ikirere.
