Mu Murenge wa Kiramuruzi i Gatsibo, umugabo w’imyaka 30 yishe umwana w’imyaka 10 amuziritse amaguru n’amaboko amujugunya mu Kiyaga cya Muhazi, mu mugitondo cyo kuri uyu wa Gatatu tariki 30 Ukuboza 2020.
Aho byabereye ni mu Kagari ka Nyabisindu. Umwana wapfuye ni umuhungu witwa Manishimwe Richard w’imyaka 10, mwene Bikorimana Léopord na Mukabahizi Joselyne.
Naho ukekwaho kumwica ni umugabo w’imyaka 30, bigasobanurwa ko yabanjye kumunigisha umugozi, akamuboha amaguru n’amaboko; hanyuma akamujugunya muri Muhazi.
CIP Hamdun Twizeyimana Umuvugizi wa Polisi y’u Rwanda mu Ntara y’Iburasirazuba yahamirije MUHAZIYACU iby’aya makuru.
Ati: “ Yego koko byabaye, icyakora kugeza ubu nta we uramenya ngo byatewe n’iki, iperereza riri bukorwe ni ryo rizagaragaza icyabiteye. Kuko yari ari ku mugezi ari umwana muto, ari kuvoma, ari kumwe n’akandi kana gato, uwo mugabo amusangayo aramwica amuta mu mazi. Akandi kana gato ni ko kagiye guhuruza.”
CIP Twizeyimana avuga ko uyu mugabo ukekwaho kwica Manishimwe nta kibazo kizwi wenda cy’uburwayi bwo mu mutwe ari afite uretse ibishobora kuzagaragazwa n’abaganga, ndetse n’umuryango umwana wishwe avukamo n’iwe si abaturanyi wenda ngo babe bafite ibyo bapfa; kuko batuye mu midugudu itandukanye.
Umurambo w’umwana wamaze kurohorwa mu kiyaga ujyanwa gukorerwa isuzuma n’abaganga.
Umugabo ukekwaho kumwica na we yatawe muri yombi, arashyikirizwa Sitasiyo ya Kiramuruzi.
CIP Twizeyimana avuga ko nk’urwego rw’umutekano, ubutumwa bwa mbere ari ukwihanganisha umuryango wabuze umwana wawo, kugira ababyeyi inama yo kurushaho kuba hafi y’abana babo, gutangira amakuru ku gihe; no gukangurira abantu kwirinda ibyaha kuko bihungabanya umutekano kandi abahamwe na byo bahanwa hakurikijwe ibyo amategeko ateganya.
Andi makuru agera kuri MUHAZIYACU ni uko abaturage bahageze mbere basa n’abatabaye basanze uyu mwana yamaze gupfa, bakadukira uyu mugabo ukekwaho kumuroha, bakamukubita ku buryo na we ubuzima bwe ngo butameze neza.
