Mu gitondo cyo kuri uyu wa Kane mu Karere ka Ngoma mu Murenge wa Gashanda mu Kagari ka Cyerwa hafatiwe umugabo w’imyaka 31 akekwaho guha umwana w’ukwezi kumwe yari yarabyaranye n’undi mugore umuti wa tiyoda nyuma yaho yamubyaye bigateza amakimbirane mu rugo rwe.
Buhiga Josue, Umunyamabanga Nshingwabikorwa w’Umurenge wa Gashanda aganira na MUHAZIYACU yavuze ko uyu mugabo yabyaranye n’undi mugore biza guteza ibibazo hagati ye n’umugore we wisezerano.
Nyuma ngo umwana yaje kurwara aho kumujyana kwa muganga bamuvurisha imiti ya Kinyarwanda akajya ayihabwa n’umugabo.
Ati “ Uwo mudamu rero yatubwiye ko ejo yamutumyeho ngo azane umwana arangije aramumuzanira undi ngo amuha ibintu by’umweru bimeze nk’amata ubundi aramutahana amugejeje mu rugo asanga yapfuye.”
Gitifu yavuze ko bahise bihutira guta muri yombi papa we kuko ngo hari ibimenyetso byinshi bimushinja ko ariwe wa mwishe birimo no kuba atarifuzaga ko uwo mwana avuka n’ibirimo ko ejo yamuhaye tiyoda.
Yasabye abaturage kujya birinda kuvurisha abana babo imiti y’ibyatsi ahubwo bakamujyana kwa muganga abaganga bakabitaho. Kuri ubu uyu mugabo afungiwe kuri sitasiyo ya RIB ya Kibungo mu gihe umwana yajyanwe kwa muganga ngo akorerwe isuzumwa.
