Bamwe mu bagize Inteko itora mu cyiciro cy’abagore batorerwa kwinjira mu Nteko Ishinga Amategeko bo mu Karere ka Nyagatare barasaba abo batoye kujya babasura kenshi, bakaza gufatanya nabo gukemura ikibazo cy’amakimbirane akigaragara mu miryango yabo, agatuma abangavu byaterwa inda z’imburagihe.
Aba baturage bavuga ko ngo baheruka Abadepite baza kwiyamamaza, bamara kubatora bakiherera mu Nteko ari ho bahera babasaba kuzabikosora ngo kuko abo bagiye gusimbura ntabyo bakoze.
Mukamana Elina wo mu Kagari ka Kibirizi Umurenge wa Musheri yagize ati” Twarabatoye ahubwo impungenge dufite abari bariho icyo kibazo ntibari bakizi? Keretse niba hari aho bavuye n’aho bagiye kutugeza, rero icyo tubasaba ni ugukemura ikibazo cy’amakimbirane.”
Busingye Jennifer wo mu Murenge wa Matimba we yagize ati” Abadepite batwizeza ko bazadufasha ariko bamara kuzamuka batuvuye i ruhande, bakagenda bagakora ibibafite inyungu zabo bwite ntibite ku ababagiriye icyizere. Rero turabasaba ko bamanuka hasi mu Mudugudu hari abadamu banywa bagasinda,icya kabiri hari n’abadamu bahohoterwa ugasanga ntibafite ijambo,twebwe turavuga kuko duturanye nabo ntibigire ikintu bitanga.”
Mutezimana Jacqueline wo mu Murenge wa Katabagemu we yavuze ko Abadepite bakwiye gukora ubuvugizi mu buryo butomoye kugira ngo amakimbirane agabanuke cyane cyane ashingiye ku mitungo atuma hatabaho ubwuzuzanye hagati y’umugabo n’umugore.
Ati” Rero twabasaba kwegera imiryango y’abashakanye bakabasobanurira neza gahunda y’imyubakire y’ingo.”
Mugenzi we Baberakubona Rachel utuye mu Kagari ka Nyagatabire mu Murenge wa Musheri asanga amakimbirane yo mu muryango aterwa na bamwe mu bagore bananiranye.
Ati”Nubwo wumva ngo abagore bahawe uburenganzira n’ijambo, hari abagore bamwe bananiranye nabo bakaza bakabegera bakabigisha kuko ntibita no ku bana babo. Ugasanga umugabo niba atashye ijoro, nawe agataha ijoro, rwose aho ntuye mbona bimbangamiye, rero bariya badepite cyane abagore mba numva rwose babihagararaho kuko abana b’abo babyeyi usanga bameze nabi, bamwe ntibaniga.”
Senateri Nkusi Juvenal umaze imyaka myinshi mu Nteko,asaba Abadepite batowe kumenya ko bari mu baturage, bavuye mu baturage bityo ko bagiye kubakorera noneho ku rwego rukuru ngo ntibagomba kubasiga inyuma.
Manda ya Gatanu y’Abadepite mu Nteko Ishinga Amategeko izaba igizwe n’abagore 51 n’abagabo 29, bivuze ko abagore bazaba bagize 63.7% bavuye kuri 61.3% bariho muri manda ishize.
