Komisiyo y’Igihugu y’Amatora(NEC) yatangaje mu buryo bwa burundu ko Kagame Paul ari we watsinze amatora n’amajwi 99.18% ku mwanya wa Perezida wa Repubulika, mu gihe abo bari bahanganye aribo Habineza Frank yagize 0.50% naho Mpayimana Phillipe agira 0,32%.
Ibyavuye mu matora mu buryo bwa burundu-NEC yabitangaje kuri uyu wa 22 Nyakanga, nyuma y’icyumweru gusa habaye amatora ya Perezida wa Repubulika yahujwe n’ay’Abadepite.
Umukandida wari watanzwe n’Umuryango FPR Inkotanyi Kagame Paul yatowe n’abaturage 8 822 794 ku baturage 9 071 157bagombaga gutora bihwanye na 99,18% umukandida w’Ishyaka riharanira Demokarasi no kurengera ibidukikije ( DGPR) yatowe n’abaturage 44 479 bahwanye na 0,50% mu gihe umukandida wigenga Mpayimana Phillipe yatowe n’abaturage 28 466 bangana na 0,32%.
Ku bijyanye n’amatora y’abadepite, Umuryango FPR-Inkotanyi n’indi mitwe ya politiki yifatanyije nawo ariyo PDC, PPC, PSR na UDPR batowe n’abaturage 6126 433 bangana na 68,83% bakaba batsindiye imyanya 37 mu Nteko Ishinga Amategeko, PL yatowe ku kigero cya 8,66% PSD na 8,62% yombi ikaba yatsindiye imyanya itanu itanu mu nteko.
Ni mu gihe PDI yatowe kuri 4,61%, DGPR itorwa kuri 4,56% na PS Imberakuri yatowe kuri 4,51%. Iyi mitwe ya politiki yose yatsindiye intebe ebyiri ebyiri mu Nteko Ishinga Amategeko; naho umukandida wigenga Nsengiyumva Janvier we ntiyabashije kubona umwanya mu Nteko Ishinga Amategeko.
Komisiyo y’Igihugu y’Amatora yashimiye buri wese wagize uruhare mu matora ya Perezida wa Repubulika n’ay’Abadepite yabaye ku matariki ya 14,15 na 16 Nyakanga 2024 ivuga ko yagenze neza aho abatoye bose ari 8 907 876 mu gihe abatoye neza ari 8 895 739 bangana na 99,86%.
