Umuyobozi w’Akarere ko Gatsibo Gasana Richard yatangaje ko kugira ngo hasigasirwe amateka yaranze Jenoside yakorewe Abatutsi mu 1994, mu Rwibutso rwa Kiziguro hagiye gushyirwamo igitabo kigaragaza amateka ari muri uru rwibutso.
Meya Gasana yavuze ko hamaze gutangwa isoko ryo kubungabunga ayo mateka kugira ngo atazibagirana.
Yagize ati:” Amateka ya Jenoside yakorewe Abatutsi mu karere kacu turimo turayandika dufatanyije n’uwatsindiye iryo soko”.
Uwo muyobozi yakomeje avuga ko bitarenze mu kwezi kwa Kamena 2024, bizewe ko iyo nyandiko iranga amateka izagaragazwa.
Ati: “Dufite icyizere ko bitarenze uyu mwaka w’ingengo y’imari mu kwezi kwa Gatandatu ubwo bushakashatsi tuzaba twabugaragaje, bishobora no kuba mbere yaho, ibiri muri icyo gitabo, amateka arimo tuzatangira kuyagaragariza ku Rwibutso rwa Kiziguro.”
Yongeyeho ati: “Ku Rwibutso rwa Kiziguro hari inkuta zabugenewe, hari ibyumba byagenewe ayo mateka ni ho tuzatangira kuyagaragariza, kandi icyo gitabo kizajya ahagaragara, ku buryo Abanyarwanda bose bashobora kugisoma”.
Sakindi Joseph umwe mu barokotse Jenoside yakorewe Abatutsi mu 1994 utuye mu Murenge wa Murambi mu Kagari ka Rwankuba mu cyahoze ari Komini Murambi, avuga ko amateka ya Jenoside yakorewe Abatutsi yakwandikwa kugira ngo bifashe urubyiruko by’umwihariko abana bavutse nyuma ya 1994 bakarushaho gusobanukirwa.
Ati: “Amateka ashyizwe mu nyandiko byafasha abana kumenya Amateka ya Jenoside, kuko twe twayananyuzemo turakuze turimo kugenda dukura, buriya byanditswe bikabungabungwa byafasha rwa rubyiruko rukiri ruto cyane cyane abana bavutse nyuma ya Jenoside.”
Urwibutso rwa Jenoside yakorewe Abatutsi rwa Kiziguro ruruhukiyemo abazize Jenoside yakorewe Abatutsi mu 1994, bagera ku 20129, ruhereye mu Murenge wa Kiziguro mu yahoze ari komini Murambi.
