Umunyonzi wo mu Murenge wa Nyamata mu Karere ka Bugesera, yatsinze abanyonzi bagenzi be ku ntera y’ibirometero 40 ahembwa moto mu isiganwa ryateguwe n’umuryango w’ivugabutumwa A Light to the Nations.
Iri siganwa ryahuje abanyonzi bo mu Karere ka Bugesera basanzwe bakora umwuga wo gutwara abagenzi ku magare, ubwo kuri uyu wa Gatatu tariki 12 Nyakanga 2023 abagera kuri 42 basiganwaga bavuye mu Mujyi wa Nyamata berekeza mu murenge wa Mareba mu birometero 40.
Muri iri siganwa hahembwe 15 ba mbere, aho umunyonzi wabaye uwa mbere yegukanye igihembo cya moto ifite agaciro ka miliyoni 2 RWF. Nyuma yo kwegukana Moto, Hakizimana yagaragaje ibyishimo avuga ko iki gihembo abonye kigiye kumuteza imbere biruseho.
Ati: “ Nishimiye igihembo mboneye muri iri siganwa ryo kunyonga igare imikorere yanjye igiye guhinduka cyane kuko kunyonga igare biravuna cyane, ntabwo nzongera gukoresha imbaraga nyinshi ntwara abagenzi.”
Akomeza agaragaza ko amadini afite uruhare mu mibereho y’abaturage.
Ati: “Amadini afite uruhare rukomeye ku rubyiruko cyane cyane kurwigisha kureka gukoresha ibiyobyabwe. Rero nanjye nkaba ndi umuhamya wo kugaragaza ko imyitwarire myiza iguhesha byinshi kuko nk’iki gihembo ntiwagitsindira ukoresha ibiyobyabwenge kandi kunyonga ahantu harehare biba bisaba ubuzima bwiza.”
Murwanashyaka Bosco, Umukozi Ushinzwe Urubyiruko Siporo n’Umuco mu Karere ka Bugesera ashima uruhare rw’amadini mu gufasha urubyiruko gutera imbere binyuze mu butumwa bw’iyobokamana ndetse no gushyiraho amarushanwa agamije kubiba umuco wo kurushanwa mu rubyiruko.
Perezida wa a Light to the Nations ku Isi, Ev. Pastor Dana Morey uri mu bateguye igiterane cy’ivugabutumwa kigiye kubera mu Bugesera avuga ko mu kugarurira Imana abazimiye, batirengagiza n’ibikorwa bizamura umukristo kugira ngo abashe kumva ubutumwa bwiza atekanye.
Yagaragaje ko batewe ishema n’uko isiganwa ryagenze by’umwihariko asaba uwegukanye moto kuyibyaza umusaruro.
Ati: “Gutsindira moto ni impano ishobora guhindura ubuzima bwe kuko umuntu watwaraga igare akaba ageze kuri moto ku munsi umwe mu irushanwa rimwe, ni ikintu cyiza cyane.”
Irushanwa ry’abanyonzi ryabaye mu rwego rwo gutegura igiterane kizatangira tariki 14 kugeza tariki 16 Nyakanga 2023 kikazabera kuri Stade y’Akarere ka Bugesera. Ni igiterane kigiye gukurikira icyabaye mu cyumweru gishize mu Karere ka Nyagatare kikitabirwa n’abantu basaga ibihumbi 50.
