Abanyamadini n’amatorero bo mu karere ka Ngoma, biyemeje kugira uruhare mu kubaka umuryango ushoboye kandi utekanye binyuze mu nyigisho zo gukangurira abayoboke bayo kwirinda amakimbirane no kubashishikariza gukora ibikorwa bibavana mu bukene.
Babivuze mu giterane ngarukamwaka cyiswe ‘Ngoma Shima Imana’ cyari kigamije gushimira Imana ku bikorwa byiza by’iterambere yakoreye abaturage ndetse n’Akarere, cyabaye kuri uyu wa wa 18 Kamena 2023, ku nsanganyamatsiko igira iti “Twubake umuryango ushoboye kandi utekanye dutegura Ejo Hazaza.”
Umunyamabanga w’ihuriro ry’amadini n’amatorero mu Karere ka Ngoma,Munyandame Daniel, waje uhagarariye umuyobozi waryo, yavuze ko bashimira Imana ku byiza yakoze mu myaka yashize ndetse ko biyemeje gukomeza ubufatanye mu kubaka umuryango ushoboye.
Ati: “Turashimira Imana dufite umutima wishimye kuko hari impamvu zikomeye z’ibyo yadukoreye, ibikorwa by’iterambere yatugejejeho n’intambwe itazasubira inyuma. Nk’abantu bahagarariye amadini n’amatorero dufatanya n’Akarere mu bikorwa byose byaba ubukungu, imibereho myiza kuko usanga umuturage Leta ihora ifite ku isonga imushyashyanira nibo dufite hariya ariyo mpamvu natwe tutaruhuka tutamugejeje ahifuzwa.”
Akomeza agira ati: “Amatorero n’amadini twiyemeje gufatanya n’Akarere mu gukangurira imiryango kubana mu mahoro, tuzakangurira umuntu gukunda umurimo, tubabwire kujya muri gahunda za Leta, abana bajye mu ishuri, kudata ishuri, tuzakangurira abantu kugira imirire iboneye; umutuku iwacu ni oya, ntagwingira, turashaka ko abantu babaho neza nk’uko insanganyamatsiko ibivuga ngo tugire umuryango ushoboye, ushobotse kandi utekanye.”
Umuyobozi w’Akarere ka Ngoma, Niyonagira Nathalie, yashimiye ihuriro ry’abafatanyabikorwa mu iterambere ry’ka karere n’urugaga rw’amadini n’amatorero; yongeraho ko ari umwanya wo gushima Imana ku bikorwa bimaze kugerwaho.
Yagize ati: “Imana ikomeje kuduha ibikorwa bitandukanye birimo amazi, amashanyarazi tukaba tumaze kugera ku rugero rushimishije kandi turakataje hakaba hari kubaka uruganda rw’amazi mu murenge wa Zaza ruzageza amazi meza ku baturage Bose b’Akarere ka Ngoma kandi tugasagarira n’utundi turere tudukikije. Ni byinshi tumaze kugeraho twasaba buri wese kuba umurinzi w’ibyagezweho.”
Umunyamabanga Nshingwabikorwa w’Intara y’Iburasirazuba Dr. Nyirahabimana Jeanne, yavuze ko hari byinshi by’iterambere byo gushimira Imana mu Karere ka Ngoma ndetse n’Intara y’Iburasirazuba “byahawe umurongo na Nyakubahwa Perezida wa Repubulika, Kagame Paul”.
Dr Nyirahabimana yabwiye Abanyamadini n’amatorero ko kugira ngo habeho umuryango ushoboye kandi utekanye bigomba guhera mu ngo(umuryango) kandi ko bitagerwaho hakiri amakimbirane.
Yagize ati: “Byose bihera mu ngo, umuryango ushoboye uba ukora ufite icyo ukuraho imibereho muri make uba ufite iby’ibanze nk’aho kuba, ibyo kurya, ufite ibituma ubaho kandi ukabaho neza. Imiryango yacu yose harimo itarabona ibyo mvuze igifite ibibazo, amakimbirane, rero tuzarebe uburyo ya miryango ikennye cyane twayifasha kwivana mu bukene.”
Muri iki giterane hashimwe bimwe mu bikorwaremezo by’ingenzi Akarere ka Ngoma kagezeho birimo Gare ya Ngoma, sitade, imihanda, Hoteli ya East Gate, amashuri n’amavuriro n’ibindi bitandukanye.
