Ubuyobozi bw’Akarere ka Kirehe bwasabye abayobozi b’ibigo by’amashuri gushikariza abarimu kugira uruhare mu miyoborere myiza, imicungire myiza, imyigire n’imyigishirize inoze, imikorere n’imikoranire myiza ku ishuri n’umuryango mugari mu kugana ku intsinzi n’iterambere rirambye.
Ibi babisabwe mu gusoza umwiherero w’uburezi kuri uyu wa Kane, tariki ya 26 Mutarama 2022, nyuma y’uko haragarajwe ko hari bimwe mu bigo ugisanga bikiri inyuma mu kunoza imiyoborere aho washoboraga kubaza bamwe imibare y’abanyeshuri bimutse, abasibiye cyangwa abafite ibibazo ugasanga ntihari, kubera kudakorana neza na barimu n’abandi bayobora.
Mu bindi harimo nko kudashashyanira abana barera, kwigisha utateguye ibyo uri butange, kutamenya gutanga inshingano kubazikwiye, kudacunga neza umutungo no kudakurikirana ibikorwa bibera mu kigo mu buryo bukwiye.
Umuyobozi w’Akarere wungirije ushinzwe imibereho myiza y’abaturage, Mukandayisenga Janvière yavuze ko umwalimu ari ishingiro ry’iterambere ry’igihugu, aboneraho kubasaba kuzana impinduka mu miyoborere n’imyigishirize y’ibigo.
Yagize ati: “Turabasaba ko bayobora Ikigo, ishuri rikaba inshuti y’umwana binyuze mu kuzana udushya dutandukanye nk’uko byatangiye nk’aho mu Karere kacu twimakaje gushyiraho igitondo cy’ishuri aho abana bazinduka bakaganira, bagaherebwa amabwiriza hamwe n’abayobozi, nanone kandi bagomba kujya bisanzura ku barimu bakabaha imfashanyigisho, amahugurwa mu rwego rwo kugana ku ntsinzi n’iterambere rirambye.”
Inkuru bifitanye isano: Kirehe: Abayobozi b’ibigo by’amashuri biyemeje kurandura ihohoterwa ribangamira imyigire y’umwana w’umukobwa
Mu kiganiro na MUHAZIYACU bamwe mu bayobora ibigo by’amashuri mu Karere ka Kirehe bavuze ko bungukiye byinshi muri uyu mwiherero ndetse ko bagiye gushyira mu bikorwa ibyo babonye bitagenda neza mu miyoborere y’ibigo.
Umuyobozi w’Ikigo cya EP Muyange, Hagenimana Jean Damascene yagize ati: “Nkanjye icyo nsigaranye ni impinduka zigamije kwita kuri byinshi tutitagaho cyane cyane mu gukoresha ururimi rw’icyongereza, gusura kenshi abarimu, gucunga umutungo w’ikigo no gufata inshingano nk’umuyobozi; mu by’ukuri tugiye guhindura byinshi mu kazi kacu nk’uko twabisabwe.”
Umuyobozi uyobora Ikigo cya Paysannat LD giherereye mu murenge wa Mahama, mu Karere ka Kirehe, Mukamugenzi Verena, yavuze ko batewe ishema n’amahugurwa bahambwa ndetse ko banakomeza kuzajya bahabwa andi mu guteza imbere uburezi.
Ati: “Maze imyaka umunani ndi umurezi gusa imbogamizi nahuraga nayo zikomeye nta makuru nari mfite ku myitwarire y’Umuyobozi kuko twakoraga ibizamini twatsinda bamwe bakajya kuyobora uko babyumva cyangwa ukagisha inama mugenzi wawe, ariko ubu turashima kuko bahora baduhugura ndetse n’ubu uyu mwiherero ugiye gutuma hari byinshi tuzana.”
Nyuma yo gusoza umwiherero amwe mu mashuri yatsindishije neza, yahembwe ibihembo bitandukanye ndetse basaba n’abandi ku bafatiraho urugero dore ko harimo abari abanyuma mu Karere ariko bakaba baraje mu b’imbere mu kugira abanyeshuri batsinze 100%.
Umwiherero w’uburezi wahariwe abayobozi b’ibigo by’amashuri mu Karere ka Kirehe warufite insanganyamatsiko igira iti ‘Uburezi kuri bose,umukobwa yige neza”
