Umuyobozi w’Akarere ka Gatsibo Gasana Richard yasabye Ihuriro ry’Abafatanyabikorwa b’Akarere kurangwa n’udushya mu byo bakora, mu rwego rwo kurushaho kwihutisha iterambere ry’abaturage no gukemura ibibazo byabo.
Ubu ni butumwa Meya Gasana yahaye abagize Ihuriro ry’Abafatanyabikorwa mu Iterambere ry’Akarere ka Gatsibo (JADF Gatsibo) kuri uyu wa 09 Kamena, mu nama y’igenamigambi yiga ku buryo igenamigambi ryabo ryahuzwa n’iry’akarere.
Meya Gasana yagarutse ku ruhare rw’abafatanyabikorwa b’Akarere mu guteza imbere imibereho myiza y’abaturage, ashima uburyo bakorana n’ubuyobozi bw’Akarere.
Yakomeje agira ati: “Turashaka kuba igicumbi cy’udushya, duhange udushya buri wese aho abarizwa waba ukorera mu kurengera uburenganzira bw’umwana aho naho ugire agashya, ndagira ngo mbasabe mu igenamigambi ryanyu rwose mutekereze cyane ku dushya tuzaranga umwaka utaha.”
Mu guhanga agashya kandi Umuyobozi w’Akarere ka Gatsibo yagarutse cyane ku cyo aka gashya kazamarira abaturage; yongeraho ko agashya kagomba kuba gakemura ibibazo by’abaturage kakaba umwihariko wa buri wese mu guteza imbere imibereho myiza y’abaturage.
Ngamije Safina, Umuyobozi Wungirije w’Ihuriro ry’Abafatanyabikorwa b’Akarere ka Gatsibo mu ijambo rye yibanze ku bufatanye bukwiye kuranga abafatanyabikorwa b’akarere n’ubuyobozi bw’akarere, yagize ati: “Turabasaba Guhuza ibikorwa by’abafatanyabikorwa n’igenamigambi ry’akarere mu mwaka wa 2022/2023, dukomeze gukorera hamwe.”
Iyi nama kandi yize ku ishyirwa mu bikorwa ry’imihigo ya 2021/2022, Akarere ka Gatsibo gafite imihigo 99 iri mu byiciro bitatu, ubukungu, imibereho myiza ndetse n’imiyoborere.
