Bamwe mu bafatanyabikorwa b’Akarere ka Kayonza baravuga ko bishimiye kongera guhurira hamwe bakamurikira abaturage ibyo bakora mu rwego rwo gukorera mu mucyo no kwemera kubazwa inshingano.
Iri murikabiko ryongeye kubaho nyuma y’imyaka ibiri ritaba kubrra icyorezo cya Covid-19, riri kubera mu Murenge wa Mukarange ahazwi nko mu mujyi wa Kayonza, ryatangiye kuri uyu wa 08 Kamena kugeza kuwa 10 Kamena.
Ryitabiriwe n’abafatanyabikorwa barenga 40 bakorera mu Karere ka Kayonza, bari mu ngeri zitandukanye, harimo amakoperative akora mu buhinzi n’ubworozi, imiryango itari iya leta yaba iyo mu gihugu cyangwa se mpuzamahanga ikorera mu Karere ka Kayonza; aba bose bahurijwe hamwe kugira ngo bamurikire banasobanurire abaturage ibyo bakora.
Perezida w’Ihuriro ry’Abafatanyabikorwa b’Akarere ka Kayonza ni Mporanumusingo Egide, yemeza ko abafatanyabikorwa b’akarere bagira uruhare runini mu bikorwa biteza imbere imibereho myiza y’abaturage, agira ati: “Ubu tugeze ku kigero gishimishije, murabizi inzara yabaga muri Kayonza mu minsi ishize, ubu hari iyo mucyumva? Navuga ko aha harimo uruhare rukomeye rw’abafatanyabikorwa.”
Imwe mu mishinga ikomeye iri gukorwa mu Karere ka Kayonza harimo kurwanya ubutayu n’amapfa mu karere cyane cyane mu bice bikunze kwibasirwa n’izuba, aho hari umushinga wiswe Green Kayonza uzashyirwa mu bikorwa na KIIWP.
Umuyobozi w’Akarere ka Kayonza Wungirije ushinzwe Imibereho Myiza, Harerimana Jean Damascéne asobanura ko iki gikorwa cyari kimaze imyaka ibiri kitaba kubera ingamba zo kwirinda icyorezo cya Covid-19.
Visi Meya Harerimana yakomeje agira ati: “Twishimiye uburyo aba bafatanyabikorwa bacu bitwaye muri ibi bihe byo kurwanya Covid-19, ibikorwa byabo ntabwo byahagaze haba ibyo kurwanya Covid-19, haba ibindi bikorwa bifasha cyangwa byunganira ubuzima bw’abaturage, ikigaragara ni uko ibi bikorwa byiyongereye mu rwego rwo gufasha abaturage mu iterambere.”
Ibikorwa byagizwemo byagizwemo uruhare n’Abafatanyabikorwa b’Akarere ka Kayonza harimo kandi imihigo y’akarere iri mu bice bitatu, ubukungu, imibereho myiza y’abaturage n’imiyoborere.
