Nikuze Charlotte w’imyaka 30 uherutse guterwa mu nzu agateragurwa ibyuma mu Murenge wa Kibungo, Akarere ka Ngoma, kuri uyu wa Kabiri, tariki 19 Mutarama yapfiriye mu Bitaro byo mu Mujyi wa Kigali.
Uyu nyakwigendera Nikuze Charlotte ku wa mbere w’iki cyumweru tariki 18 Matarama 2021, nibwo yatewe mu nzu mu rugo iwe mu Murenge wa Kibungo, Akagari ka Gatonze, Umudugudu wa Nyagatovi, ku mwanywa, ateragurwa ibyuma, bigakekwa ko abakoze ubwo bugome bari bagamije kumwambura amafaranga ibihumbi 500Frw.
Ibyo bimaze kuba Ubuyobozi n’inzego z’umutekano zihutiye kuhagera, maze Nikuze agezwa ku Bitaro Bikuru bya Kibungo atarashiramo umwaka, ariko ngo yari ameze nabi cyane, arembye.
Amakuru MUHAZIYACU ifite ni uko kubera ko yari yakorewe ubugome bukabije yateraguwe ibyuma, yavuye amaraso menshi, byabaye ngombwa ko Ibitaro bya Kibungo bimwohereza ku Bitaro bya Kaminuza bya Kigali- CHUK, ariko kuri uyu wa Kabiri tariki 19 Mutarama 2021 byarangiye, Nikuze Charlotte apfuye.
Kanzayire Consolée, Umunyamabanga Nshingwabikorwa w’Umurenge wa Kibungo yabwiye MUHAZIYACU ko iyi nkuru ibabaje y’urupfu rwa Nikuze yamenyekanye ku gicamunsi cyo kuri uyu wa Kabiri.
Mu butumwa bugufi yanditse ati: “Wa mudame (Nikuze Charlotte) byarangiye yitabye Imana kuri iki gicamunsi. Gusa umugizi wa nabi wahitanye ubuzima bwe yamenyekanye, Imana imwakire mu bayo.”
Inkuru yabanjirije iyi wasoma ukamenya uko byatangiye:
Ngoma: Umugore yatewe mu nzu ateragurwa ibyuma, harakekwa abashakaga kumwiba.
