Mu Karere ka Nyagatare hasojwe itorero ry’abarinzi b’ibyambu 402 bo mu mirenge itandatu ihana imbibi n’umupaka wa Uganda, aho basabwe na Minisitiri w’Ubutegetsi bw’Igihugu Gatabazi Jean Marie Vianney kurushaho kuba maso bahangana n’abakora ibyaha byambukiranya umupaka.
Mu rwego rwo guhangana n’ibikorwa by’ubufutuzi, kwambutsa magendu, kwinjiza ibiyobyabwenge bikunze kwigaragaza mu Karere ka Nyagatare, hafashwe umwanzuro wo gushaka uko hakumirwa ibi bikorwa.
Bamwe mu barinzi b’ibyambu basoje itorero bemeza batojwe gukunda igihugu, Uwingabire Joseline ni umurinzi w’icyambu mu Mudugudu wa Munini, Akagari ka Kagitumba, mu Murenge wa Matimba avuga ko ibyambu bizengurutse Umuvumba birenga 20.
Yagize ati “Hari ibikorwa byinshi byakorwaga binyuze mu nzira zitemewe harimo kwambutsa magendu ubufutuzi, ikindi ni uko n’umwanzi yanyura muri izo nzira akaba yaduhungabanyiriza umutekano.”
Muri ibi bice bakunze kwinjiza icyo bita Indiboti (Caguwa) Kandi izo nzira ngo zidacunzwe neza zanyurwamo n’ushaka guhungabanya umutekano w’Ugihugu.
Bamurate Vianney ni umurinzi w’ibyambu wo mu Murenge wa Tabagwe, Akagari ka Nyagatoma mu Mudugudu wa Kabusunzu, yemeza ko ntawabaca mu rihumye ndetse ko nta n’icyo yashukishwa kabone niyo yaba ari umwe mubo mu muryango we.
Yakomeje agira ati: “Ni akazi katoroshye ariko kuko mparanira umutekano w’igihugu cyanjye, kandi natojwe umuco wo gukunda igihugu numva ntacyandutira igihugu cyanjye niyo mpamvu nahisemo kurwanya uwateza umutekano mucye wese n’inzira zose yacamo.”
Ubwo hasozwaga iri torero Minisitiri w’ubutegetsi bw’igihugu Gatabazi Jean Marie Vianney yashimye uru rubyiruko rwiyemeje kurwanya ikibi,
Yakomeje agira ati: “Turabashima ko aho mwatangiriye gukora hari byinshi byagabanyutse, kandi mukomereze aho akazi mukora byagaragaye ko kafashije inzego zose yaba iz’umutekano, n’izi nzego z’ibanze.”
Abarinzi b’ibyambu bo muri Nyagatare bakorera mu mirenge ya Kiyombe, Karama, Tabagwe, Rwempasha, Matimba na Musheri uko ari 402 bagenewe agahimbazamusyi kandi bazajya bakora basimburanwa; bagenewe amafaranga y’ u Rwanda ibihumbi 45 nk’agahimbazamusyi ku wakoze iminsi yose y’ukwezi.
