Federasiyo y’Umukino wa Volleyball mu Rwanda(FRVB) yatangaje ko imikino ya Shampiyona y’Igihugu y’umukino wa Volleyball yari iteganyijwe kubera mu Karere ka Kirehe muri Gymnase ya Kirehe kuri uyu wa Gatandatu, yimuriwe ku Cyumweru tariki 25 Ukwakira 2026; kubera ko amatora y’inzego z’imitegekere y’Igihugu zegerejwe abaturage.
Itangazo FRVB yanyujije ku rubuga rwa X, rimenyesha impinduka z’umunsi iyo mikino izaberaho, rigira riti: “Kubera amatora y’inzego z’ibanze ateganyijwe ku wa 24 Ukwakira 2026, imikino y’umunsi wa 2 wa shampiyona ya #RNVL yari iteganyijwe kuri iyo tariki yimuriwe ku Cyumweru, tariki ya 25 Ukwakira 2026. Ahazabera imikino n’amasaha izaberaho ntibyahindutse.”
FRVB yatangaje ko nk’uko byari biteganyijwe imikino izakinirwa mu nzu y’imikino n’imyidagaduro, muri Gymnase ya Kirehe ariho n’ubundi iyi izabera, hakaba hazakina gusa amakipe yo muri Divisiyo ya mbere mu cyiciro cy’Abagabo.
Nk’uko gahunda y’imikino izakirwa kuri iki Cyumweru mu cyiciro cy’abagabo ibigaragaza, biteganyijwe ko hazakinwa imikino irimo: RP Ngoma VC-Gisagara Volleyball Club, REG VC-Kigali Volleyball Club, Police VC-EAU Rwanda, na Kirehe VC- APR VC.
Inkuru yabanje: Gymnase ya Kirehe iratangira kwakira Shampiyona ya Volleyball
