Ihuriro ry’abakobwa begukanye ikamba rya Miss Rwanda mu bihe bitandukanye ryishyuriye ubwisungane mu kwivuza bwa Mituweri, abaturage 250 bo mu Ntara y’Iburasirazuba.
Ni igikorwa cyabaye kuri uyu wa Gatanu mu Karere ka Rwamagana kuri Sale y’urubyiruko ya Yego center, kitabirirwa n’abayobozi batandukanye barangajwe imbere n’ Umuyobozi w’Intara y’Iburasirazuba Mufulukye Fred.
Mutesi Jolly wavuze mu izina ry’abandi ba nyampinga yavuze ko amafaranga bishyuriyemo mitiweri aba baturage ari ubushobozi bishatsemo ariko ngo uko bazajya babona n’ubundi bushobozi ngo bazajya bakomeza gufasha abatishoboye.
Ati: ”Twishyize hamwe nk’abana banyu mwitoreye, natwe dushaka gukoresha amahirwe mwaduhaye kugira ngo twifatanye muri ibi bihe bikomeye ndetse binagoye. Twishatsemo ubushobozi bwo kwishyurira bake ubwisungane mu kwivuza, tubona 250, ariko uko ubushobozi buzagenda bwaguka tuzagaruka dufatanye no mu bindi.”
Guverineri w’Intara y’Iburasirazuba Mufulukye Fred, yashimiye aba bakobwa ku nkunga yabo batangiye abaturage batishoboye, avuga ko baterwa ishema n’urubyiruko rwo muri iki gihe rutanga icyizere cy’ejo heza h’igihugu.
Ati: “Turabashimiye cyane, twebwe nk’ababyeyi iyo tubonye urubyiruko ruri mu cyerekezo nk’iki bitwereka ko ejo h’igihugu cyacu ari heza, biduha ibyiringiro ko igihugu cyacu gifite abana bagikunda.”
Nyampinga Foundation ni ihuriro ry’abakobwa bagiye bahiga abandi muri Miss Rwanda mu myaka itandukanye rikaba ribarizwamo abanyamuryango batandatu barimo Bahati Grace, Kayibanda Aurore, Kundwa Doriane, Akiwacu Colombe, Jolly Mutesi na Nishimwe Naomie ndetse na Muganwa Larry, umugabo watangiranye na bo.
