Ubuyobozi bw’Akarere ka Ngoma burasaba Leta ubwunganizi mu gutubura ibiti byo mu bwoko bw’ibigazi n’Ibifenesi.
Akarere kagaragaza ko ibyo biti bibonetse bihagije byaba igisubizo ku kwita ku bidukikije, ariko bikongera ubukungu n’imibereho myiza by’abatuye Ngoma n’igihugu.
Ibiti byitwa Ibigazi byera imbuto zikorwamo amamesa, bihingwa ku bwiganze mu mirenge ya Rukumberi na Sake. Ubuyobozi bw’Akarere ka Ngoma bugaragaza ko ibi biti biteye ku buso bwa hegiteri 40.
Ibiti by’Ibifenesi byo byera imbuto ziribwa byo byiganjemo mirenge ya Sake, Rukumberi, Zaza na Jarama yo muri Ngoma, no mu Murenge wa Gahara mu Karere ka Kirehe.
Umuyobozi w’Akerere ka Ngoma Nambaje Aphrodise, avuga ko bifuza ko Leta yashyira mu iteganyabikorwa kwita ku gutubura ingemwe z’ubwo bwoko bwombi bw’ibiti.
Ati: “Twifuza uburyo bwo gutubura ibyo biti kuko busa n’aho bushaka tekinike n’ubumenyi buhambaye, turifuza gufashwa kugira ngo iki gice cy’iwacu kizabe kibereye amaso, gikikijwe n’ibiti by’Ibigazi tubone Amamesa, ibiryo by’amatungo ; n’ibindi byagikomokaho.”
Yongeyeho ati: “Twatangiye no gutekereza ku kindi giti kitwa ‘Igifenesi’, hari abaturage batangiye kubitera, cyera imbuto kandi hari n’amakuru dufite ko kivamo umutobe mwiza, ushobora no kuvanwamo ibindi binyobwa.”
Hari abaturage bo mu Murenge wa Rukumberi umwe mu igaragaramo ibyo bihingwa byombi, bagaragaza ko ibiti by’umwihariko ari ingenzi mu bukungu kandi bifuza ingemwe za byo.
Umubyeyi witwa Uwamariya Jeannette ati : “Mu kibanza ntuyemo mfite Ibifenesi bine byose natangiye kubisarura, ndabirya ibindi nkabigurisha; kimwe hagati ya 1500frw na 2000frw barayaguha. Ariko dufashijwe kubona ingemwe zabyo byaba ari byiza, ubu ntabwo ushobora kubona aho biri muri Pipinyeri, ni ugutegereza ku bw’amahirwe kikimeza.’’
Uwitwa Habimana Léonidas wo mu Kagari ka Rubago na we ati: “Iwanjye nta giti cy’Igifenesi cyangwa Ikigazi mfite mu rugo ariko mbibonye byambera byiza, kuko najya mbona imbuto, abana bakarya nkanagurisha. Ubu abafite Ibigazi bo barya Amamesa batayaguze andi bakayagurisha, kuko barayikamurira.”
By’umwihariko, ibiti by’ibigazi biteganyijwe guterwa mu nkengero z’ibiyaga (buffer zones) biherereye mu murenge wa Rukumberi n’imirenge iwukikije, ari byo Mugesera, Birira na Sake, ndetse n’uruzi rw’Akagera.
Ibi ngo byakongera umusaruro ariko nanone bikaba byanazamura ubukerarugendo, kubera ubwiza bw’ibi biti.
Minisiteri y’ibidukikije, igaragaza ko gutubura ibiti by’Ibigazi n’Ibifensi bizashyirwa mu igenamigambi.
Umunyamabanga uhoraho muri iyo Minisiteri, Fatina Mukarubibi ni byo asobanura, ati: “Tugiye gufatanya gushyiraho gahunda yihariye yo gutera amashyamba muri iki gice cy’Iburasirazuba by’umwiharimo muri aka Karere ka Ngoma. Kandi buriya bwoko bw’ibiti bwagaragaye ko bushobora kwera neza bugatanga umusaruro bikanongera ubuso buteyeho amashyamba muri aka karere birimo Ibigazi n’ibifenesi, tuzafatanya kugira ngo tubishyire muri gahunda yihariye.”
Muri uyu mwaka 2019/2020 Ingengo y’Imari Leta yageneye Akarere ka Ngoma yo gufasha abaturage kubona ingamwe z’ibiti, ni amafaranga y’u Rwanda asaga miliyoni 51. Yaragabanutse ugereranyije na miliyoni zisaga 270 Frw kari kagenewe muri 2018/2019.
Akarere ka Ngoma kagaragaza ko ubuso bwa ko buteyeho ibiti n’amashyamba buri ku gipimo cya 12.7%.
