Kayonga Aloys, umuyobozi w’uruganda rwitwa Ingenzi Processing Factory, wo mu Karere ka Gatsibo, Umurenge wa Kabarore, avuga ko ibitutsi yatutswe ubwo yigiraga ufite ubumuga bwo kutumva no kutavuga, biri mu byamuteye gushinga ishuri rikura abafite ubumuga butandukanye mu bwigunge.
Muri Gashyantare uyu mwaka, ni bwo uyu mugabo w’imyaka 34 yatangije iri shuri, avuga ko igitekerezo cyavuye ku byamubayeho ubwo yari mu rugendo, akaka umucuruzi icyo kunywa akoresheje amarenga nk’ufite ubumuga bwo kutumva no kutavuga, aho kukimuha akamutuka.
Ati: “Umucuruzi yaje arimo agurisha ku modoka ibinyobwa bitandukanye, nanjye ntangira kubimwaka nkoresheje amarenga, aho kumpa icyo nashakaga ahita abwira mugenzi we ngo, uzi ko runo rugabo ari ururagi, ahita yigendera, numva agahinda karanyishe.”
Akomeza agaragaza ko ari ibintu yari amaranye iminsi mu bitekerezo, yibaza uko abantu bafite ubumuga bitabwaho muri sosiyete.
Ati: “Nabonaga abantu bafite ubumuga nkibaza uko babayeho, cyane cyane mu gihe hari icyo bacyeneye, gusa naje gusanga hari aho bagihohoterwa kandi bitari bikwiye.”
Kayonga Aloys, yemeza ko ibyamubayeho byabaye intandaro yo guhita atangiza ishuri ritanga amahugurwa yo gukora bimwe mu bikorwa byabateza imbere, harimo gukora inkweto, amavuta, isabune, abandi bagakora mu ruganda abereye umuyobozi, ikirenze kuri ibyo yanahawe amahugurwa yo kubigisha.
Ati: “Kubera ibyo byose nabonye ko ari abantu batisanzuranaho n’abandi, nyuma rero nibwo naganiriye na bagenzi banjye twiyemeza kubafasha, tubigisha kudoda inkweto, gukora amavuta n’isabune. Ikirenze kuri ibyo abenshi muri bo tubaha akazi mu ruganda.
Kayonga Aloys mu mboni ze, abona ko abantu bafite ubumuga ari bo bashoboye gukora akazi neza bagashyizeho umutima, kurenza n’abadafite ubumuga.
Ati: “Umuntu ufite ubumuga bwo kutabona iyo akora akazi nta bindi yarangariramo, ntabwo azajya kuri watsapu (Whatsapp) ngo ayirangarireho, ikindi ufite ubumuga bwo kutavuga no kutumva nta mwanya aba afite wo kwirirwa aca amarenga kandi intoki ari zo ari gukoresha.”
Ibi kandi bishimangirwa na mugenzi we bafatanya ibikorwa byo guha amahugurwa abafite ubumuga, Nsabimana Theoneste, akaba ari umuyobozi wa Koperative ingenzi, ibarizwamo n’uruganda bahabwamo akazi iyo basoje kwiga.
Agira ati: “Nyuma yo gukorana n’abafite ubumuga butandukanye twaje no kujya mu mahugurwa yabyo, nyuma twasanze ari abakozi bakomeye kandi bashoboye akazi, ni abahanga ku rwego rwo hejuru, nubwo hari abantu bababona nk’abantu badashoboye ariko iyo urebye kure ubona ko ari bo bantu bashoboye cyane.”
Mu mezi ane bamaze bakora ibikorwa byo guhugura abafite ubumuga, bamaze guhugura abagera kuri 30 kuri ubu bakora ibikorwa bitandukanye bibinjiriza amafaranga birimo kudoda inkweto, gukora isabune n’amavuta abandi bahawe akazi mu ruganda.
