Urukiko rwa rubanda rw’i Paris mu Bufaransa kuri uyu wa 18 Gicurasi rukomeje kuburanisha urubanza rwa Laurent Bucyibaruta ukurikiranweho ibyaha bifitanye isano na Jenoside yakorewe Abatutsi mu 1994 mu Rwanda.
Urukiko ruri kumva abatangabuhamya basabwe n’ubushinjacyaha, bakaba batanga ubuhamya bwerekeye ahanini ubwicanyi bwakorewe i Kibeho hagati ya tariki 11 na 15 Mata 1994.
Umwe mu batangabuhamya wumviswe uyu munsi ni umugabo w’imyaka 67 ufungiye muri gereza ya Nyanza, wabwiye urukiko ko afungiye ibyaha bya jenoside.
Hifashishijwe ikoranabuhanga aratanga ubuhamya ari i Kigali kandi agaragara mu myenda isanzwe y’abagororwa mu Rwanda.
Umutangabuhamya yavuze ko yakoze nka Agronome ku ruganda rw’icyayi rwa Mata kugera muri Kamena 1994 ubwo yongeraga na none kugirwa burugumesitiri wa Komini Mubuga.
Uyu mutangabuhamya yemeza ko icyo gihe uruganda rwa Mata rwayoborwaga n’uwitwaga Ndabarinze Juvenal wakomokaga mu majyaruguru y’u Rwanda, uyu Ndabarinze ngo yajyaga cyane mu bya politiki.
Ubuhamya bwe bushingiye ku byo avuga ko yabonye mu gihe yakoraga mu ruganda, yabwiye Urukiko ko muri icyo gihe i Mata hari abasirikare bo muri ESO bazaga guha urubyiruko imyitozo ya gisirikare.
Abajijwe ukuntu uruganda rw’icyayi rwakorewemo imyitozo ya gisirikare kandi atari ikigo cya gisirikare avuga ko aho i Mata na mbere y’uko Inkotanyi zitera ngo hari harimuwe abaturage bashaka kuhubaka ikigo cya gisirikare
Usibye uyu mutangabuhamya ku munsi w’ejo hashize humviswe undi mutangabuhamya, Umugabo w’imyaka 58 ukomoka mu yahoze ari perefegitura ya Gikongoro akaba yarakatiwe n’inkiko gacaca ku ruhare yagize muri jenoside yakorewe abatutsi.
Uyu mutangabuhamya yabwiye urukiko ko nyuma y’uko abatutsi bishwe n’inzu zabo zigatwikwa Perefe Laurent Bucyibaruta ngo yaraje abwira abaturage ko nihaza abanyamahanga bakabaza aho abantu bari batuye mu nzu zasenywe bagiye, ngo bajye bavuga ko bahunze kandi batamenye igihe bahungiye.
Bukibaruta Laurent mu gihe cya Jenoside yakorewe abatutsi mu 1994 yari Perefe wa Perefegitura ya Gikongoro, kuva ku tariki ya 09 Gicurasi 2022 nibwo Urukiko rwa rubanda rwatangiye kuburanisha uru rubanza, rukaba rugikomeje.
