Ikigo cy’Igihugu cy’Ibarurishamibare, NISR, cyatangaje ko mu gihembwe cya gatatu cya 2024, umusaruro mbumbe w’Igihugu(GDP) wiyongereyeho 8.1%, ugereranyije n’igihembwe cya Gatatu cya 2023, ukava kuri miliyari 4,246Frw ukagera miliyari 4,806Frw.
Ibi ni bikubiye muri raporo ya NISR yasohowe kuri uyu wa Kabiri, tariki 17 Ukuboza 2024 yerekana ko umusaruro mbumbe w’imbere mu Gihugu uhagaze.
Imibare igaragaza ko urwego rwa serivisi arirwo rukomeje kugira uruhare runini mu iterambere ry’Igihugu aho rwagize uruhare rungana na 49%, ubuhinzi bugira 24%, mu gihe urwego rw’inganda rwagize uruhare rungana na 20%, imisoro yinjijwe igira 7%.
Mu gihembwe cya Gatatu cy’umwaka wa 2024, umusaruro mbumbe wiyongereyo 8.1% nyuma y’uko wari wiyongereyo 9.8% mu gihembwe cya kabiri na 9.7% mu gihembwe cya mbere.
Muri rusange umusaruro mbumbe wiyongereyo 9.2% mu bihembwe bitatu bibanza bya 2024(Mutarama-Nzeri).
Mu byiciro by’ubukungu mu buhinzi wiyongereyo 4%, Inganda 8%, Serivisi 10%.
NISR ivuga ko umusaruro w’ubuhinzi wiyongereyo 4% bitewe no kwiyongera kwa 2% k’umusaruro w’ibihingwa ngandurarugo ndetse no kwiyongera kwa 16% k’umusaruro ibihingwa ngengabukungu. Umusaruro w’ibihingwa ngengabukungu wiyongereyo ahanini bitewe n’umusaruro wa kawa wiyongereyo 22%.
Umusaruro w’inganda wiyongereyo 8% bitewe n’izamuka rya 26% ry’umusaruro w’ubucukuzi bw’amabuye y’agaciro na kariyeri, izamuka rya 5% ry’umusaruro w’inganda zitunganya ibintu bitandukanye, ndetse n’izamuka rya 5% ry’umusaruro w’imirimo y’ubwubatsi.
Umusaruro w’inganda zitunganya ibintu bitandukanye wiyongereye bitewe ahanini n’izamuka rya 20% ry’umusaruro w’inganda zitunganya ibinyabutabire, 14% ku musaruro w’inganda zitunganya ibyuma, mu gihe umusaruro w’inganda zikorwa ubudozi n’ibikoresho byo mu ruhu wazamutseho 11%.
Ku rundi ruhande umusaruro w’inganda zitunganya ibyo kurya wagabanutseho 1% nyuma y’uko wari wariyongereyeho 16% mu gihembwe cya Gatatu cya 2023.
Umusaruro wa serivise wiyongereyo 10% bitewe ahanini n’umusaruro w’ubucuruzi buranguza n’ubudandaza wiyongereyo 19%, uw’ibikorwa by’ubwikorezi wiyongereyo 8%, umusaruro w’amahoteli na resitora wiyongereyo 17%, umusaruro wa serivise z’ikoranabuhanga n’itumanaho wiyongereyo 19%, uwa serivise z’ibigo by’imari n’ubwishingizi wiyongereyo 15%.
