Bimwe mu bibazo bituma abana bagira imyitwarire mibi irimo guta amashuri bakajya mu muhanda cyangwa bakajya gukoreshwa imirimo ivunanye, harimo no kuba imyiryango baturukamo iba ifitanye amakimbirane.
Mu rwego rwo gushakira umuti iki kibazo cyimaze kuba karande mu miryango itari mike, kuri uyu wa Kabiri tariki ya 07 Ugushyingo 2021, Ubuyobozi bw’Akarere ka Bugesera kimwe n’utundi turere two mu Ntara y’Iburasirazuba, batangije ubukangurambaga bugamije kurengera umwana.
Bamwe mu baturage bo mu Karere ka Bugesera baganiriye na MUHAZIYACU, bavuze ko zimwe mu mpamvu zituma abana bagira uburere bubi ahanini biterwa n’imwe mu miryango iba itabanye neza biryo bagahitamo kuyihunga, bamwe bakajya mu mihanda n’aho abandi bakajya gushaka akazi bataye amashuri.
Nyirandegeya Diane, utuye mu Mudugudu wa Mukoma mu Kagari ka Maranyundo mu Murenge wa Nyamata, yagize ati: “Njyewe mbona kwangirika kw’abana, hari ababyeyi babigiramo uruhare, nk’umubyeyi ntiyite ku mwana nawe akaba tereriyo, cyane cyane nka ba babyeyi bakunda kwibera mu kabari.”
Nyirandegeya avuga ko hari abana baba mu mibereho mibi bitewe n’umuryango uko ubayeho.
Ati: “Inshuro nyishi kandi bituruka ku miryango ibana nabi n’amakimbirane mu muryango, ugasanga rero ibyo bintu byica abana mu bwonko.”
Umuyobozi w’Akarere ka Bugesera, Richard Mutabazi yavuze ko hakiri ibibazo byinshi mu kurengera umwana, ikaba ari nayo mpamvu habayeho gahunda y’ubukandurambanga kugira ngo buri wese utumvaga uburenganzira bw’umwana abwumve.
Yagize ati: “ Hasanzwe hariho gahunda ziharanira uburenganzira bw’umwana, ariko iyo abantu bavuze ngo dukore ubukangurambaga, ni ukugira ngo ibyo bintu bihabwe umwihariko kurusha ibindi byose dukora buri munsi. Abantu bongere babyumve, uwutari uzi ubwo burenganzira bw’umwana yongere abwumve.”
Mu Karere Ka Bugesera habarurwa abakobwa 378 batewe inda bakiri abangavu hagati y’umwaja wa 2020 na 2021.
Ni mu gihe kandi abana bagera kuri 19 bagarutse mu muhanda. Raporo yo kuwa 7 Ukwakira uyu mwaka igaragaza ko bamaze gukura abana 11 mu mirimo mibi ikoreshwa abana.
Ubu bukangurambaga buzasozwa tariki ya 14/12/2021 buzibanda ku bikorwa bitandukanye birimo urugendo rugufi rwo kwamagana abahohotera abana; ibiganiro, indirimbo, imivugo, ikinamico, ubuhamya, ibiganiro mu bitangazamakuru bitandukanye n’imbuga nkoranyambaga.
