Ubuyobozi bw’Akarere ka Bugesera bwibukije abaturage ko nta mbogamizi bakwiye kugira urwitwazo mu guhabwa urukingo mu gihe waba ufite icyangombwa icyo aricyo cyose kikuranga, bityo ko kutagira indangamuntu bidakwiye kuba urwitwazo rwo kutikingiza Covid-19.
Ni mu gihe hari bamwe mu baturage bavuga ko kuba batitabira gahunda y’ikingira ari uko badafite amarangamuntu.
Ndacyayisenga Patrick wo mu Mudugudu wa Rwarusaku mu Kagari ka Kibenga mu Murenge wa Mayange avuga ko kuba atari yagafashe urukingo rwa Covid-19 ari uko yumvaga ko kuba nta ndangamuntu afite atahabwa iyo serivisi.
Ati: “Nari nzi ko kuba udafite indangamuntu utahabwa urukingo, ariko maze gusobanukirwa ko umuntu akoresha n’ikindi cyangombwa kimuranga ubundi agahabwa urukingo.”
Bakirarwinshi Jean Claude utuye mu Kagari ka Gakamba mu Murenge wa Mayange, kuri uyu wa mbere ni bwo yije kwikingiza urukingo rwa mbere, yabwiye MUHAZIYACU ko abantu badakwiye kwanga kwikingiza bitwaje ko nta marangamuntu bafite
Ati: “Abantu bareke kwitwaza ko nta marangamuntu bafite ngo bange kwikingiza, kuko n’ikindi cyangombwa kiranga umuntu gishobora kubafasha kugira ngo bahabwe urukingo, kandi nanone bigaragara ko n’inzego z’ubuyobozi bw’ibanze zibafasha mu kumenya amakuru ndetse n’aho bakwiye kubonera serivisi runaka.”
Umuyobozi w’Akarere ka Bugesera, Mutabazi Richard yabwiye MUHAZIYACU ko abaturage b’aka Karere batari bikingiza basabwa kwihutira gufata urukingo mu rwego rwo kwirinda no guhashya Icyorezo cya Covid-19, kandi bakomeje gusobanurira muri wese ko kuba nta ndandamuntu afiite bitaba impamvu yo gudafata urukingo
Ati: “Udafite indangamuntu arakingirwa, agakoresha ikindi cyangombwa cyose yabona. Igikenewe ni ikigaragaza imyaka afite kuko inkingo zitandukanye bitewe n’imyaka, ndetse n’umwirondoro we kugira ngo ubikwe muri ‘system’.”
Yakomeje agira ati: “Abatarafata urukingo bose bakwiye kwihutira kurufata, kandi abatoroherezwa n’aho bari bamenye ko ubwo babuzwa uburenganzira ku buzima. Byaba n’icyaha.”
Imibare itangwa n’ishami rishinzwe ubuzima mu Karere ka Bugesera igaragaza ko muri aka Karere abasaga 8000 batarafata urukingo rwa Covid-19 Doze ya mbere. Ni mu gihe kandi abamaze gukingirwa Doze mbere basaga 95%.
