Abageze mu zabukuru bo mu Karere ka Bugesera bazindukiye mu gikorwa cyo guhabwa urukingo rwa Covid-19 rwo mu bwoko bwa Johnson & Johnson rutangwa inshuro imwe, kuri uyu wa 22 Nzeri.
By’umwihariko mu Mujyi wa Nyamata, urujya n’uruza rw’abageze mu zabukuru; ni ukuvuga abantu barengeje imyaka 50 y’amavuko, bitabiriye iki gikorwa kuri Sitade y’Akarere ka Bugesera, ahari site isanzwe itangirwaho inkingo za Covid-19.
Mu baganiriye na MUHAZIYACU, bavuze ko bakiriye neza igikorwa cyo guhabwa uru rukingo, bikaba akarusho kuko baruhawe inshuro imwe gusa, bityo batazagaruka gufata indi Doze nk’uko bisanzwe ku bundi bwoko bw’inkingo za Covid-19.
Nkurikiyimfura Eugene w’imyaka 65, utuye mu Murenge wa Nyamata, amaze guhabwa urukingo,
Yagize ati: “Mbyakiriye neza kuko ni umunsi umwe; ntabwo umuntu aza hano ngo ahatinde. Ubu ni kuvuga ngo ningera mu rugo ndabikangurira n’abandi baze bose; hekugira usigara kuko urukingo ni rwiza ruturinga iriya ndwara.”
Nsabimana Emmanuel utuye mu mugi wa Nyamata, na we yari yaje kwikingiza Covid-19, yavuze ko ingamba ahakuye ari uko agiye gushishikariza n’abandi ubwiza b’urukingo.
Ati: “Kubera ko ndi n’umupasiteri, ngiye gukomeza no kubikangurira Abakirisitu; abafite imyumvire itari myiza tubumvishe ibyiza by’urukingo.”
Mwumvaneza Jehovanie, na we uri mu zabukuru, atuye mu murenge wa Nyamata.
Uyu musaza uri mu kigero cy’imyaka 60 , avuga ko yanejejwe n’uko iki cyorezo cyabonewe urukingo, bityo ko yagombaga gufata iyambere mu kuza kwikingiza urukingo rwa Covid-19.
Ati: “Nkurikije uko iyi Covid-19 igenda yandura, navuze ngo nanjye reka mfate umwanya wa mbere mu bajya kwikingiza. Ngomba kugera mu rugo nkababwira ko guza kwikingiza ari byiza, kuko bigomba gufasha uwakingiwe kugira ngo utaraza kwikingiza atanduza abikingije.”
Ubuyobozi bw’Umurenge wa Nyamata ari naho Umujyi wa Nyamata uherereye bufite ikizere ko iki gikorwa kitazarenza iminzi 3 ugereranije n’ubushake n’umuhate w’abitabiriye ku munsi wambere w’igikorwa cyo gukingira abantu bari hejuru y’imyaka 50 y’amavuko.
Mu izina ry’Umunyamabanga Nshigwabikorwa w’Umurenge akaba anahagarariye site iri gukorerwaho igikorwa cyo gukigira Covid -19, Umurerwa Adeline, ushinzwe Imari n’Abakozi mu Murenge wa Nyamata, yabwiye MUHAZIYACU ko iki gikorwa cyo gukingira kiri kugenda neza, by’umwihariko kuri site ikorera kuri sitade y’Akarere ka Bugesera ahagarariye. Umurerwa arashishikariza abantu bafite imyaka 50 kuzamura, kudacikanwa n’aya mahirwe.
Ati: “Uyu munsi twatangiye gutanga urukingo rwa Johnson & Johnson, tukaba turi guha abantu bafite imyaka 50 kuzamura; nibo bemerewe uru rukingo. Nkaba mbona ubwitabire buhagije, n’abataritabira tukaba tubasaba gukomeza kuza kugira ngo urwo rukingo baruhabwe kandi badacikanwa n’amahirwe baba babonye.”
Imibare igaragaza ko abagera kuri 2065 aribo bateganya guhabwa uru rukingo rwo mu bwoko bwa Johnson & Johnson muri uyu Murenge wa Nyamata.
Uyu mubare uje wiyongera ku bandi bageze mu zabukuru 3000 bamaze kuhabwa urukingo rwa Covid-19 Doze ebyiri. Mu Murenge wa Nyamata hakaba habarurwa abageze mu zabukuru basaga gato 6000.
