Abafite ibibazo by’uburwayi butabemerera kugera ku masite atangirwaho inkingo n’abageze mu zabukuru bo mu Karere ka Bugesera bishimira ko bari guhabwa urukingo rwa Covid-19, aho abaganga babifashijwemo n’Ubuyobozi bw’inzego z’ibanze babasanga aho batuye.
Baganira na MUHAZIYACU, abegerejwe serivisi yo kuhabwa urukingo bavuze ko bashimira ubuyobozi ko bwabatekerejeho bukaba buri kubasanga mu ngo zabo bakabaha urukingo,
Uwiringiyimana Francine ni umubyeyi w’imyaka 40, atuye mu Mudugudu wa Rwarusaku mu Kagari ka Kibenga mu Murenge wa Manyange, afite uburwayi butamwemereraga kugera kuri site y’ikingira. Nyuma yo gukungirwa asanzwe mu rugo, yavuze ko kuba umuganga amusanze mu rugo ari iby’igiciro kandi ko ari ikigaragaza ko Leta y’u Rwanda yita ku baturage
Ati: “Ni byiza nabishimye uburyo batwitayeho bakadusanga mu ngo batadukingira Covid 19. Rwose dukomeje gushima uburyo ubuyobozi bukomeje kutwitaho nk’abaturage.”
Kabayiza Sylver utuye mu Mudugudu wa Rwarusaku avuga ko kuba amaze igihe kinini atarafata urukingo ko byatewe n’uburwayi,
Ati: “Mu by’ukuri nishimiye ko mpawe urukingo nyuma y’igihe kirekire ntararufata bitewe n’uburwayi butanyemerera kuva mu rugo, ariko kuri uyu munsi nkaba ndubonye; ni igikorwa cyiza ubuyobozi buri kudukorera nk’Abanyarwanda.”
Umulisa Beatrice, Umunyamabanga Nshingwabikorwa w’Akagari ka Kibenga, agaragaza ko kuba hakiri abatarahabwa urukingo biterwa n’uko hari abantu baba bafite intege nke, bityo ntibabashe kugera ahatangirwa inkingo
Yakomeje agira ati: “Twari dufite abaturage batitabiriye gahunda y’ikingira mu kagari kacu bitewe n’uko hari abatarabashaga kugera kwa muganga ahatangirwa serivisi z’ikingira, ariko kugeza ubu biri gukemuka kuko bari gusangwa mu ngo bagahabwa urukingo.”
Mu Karere ka Bugesera habarurwa abasaga ibihumbi 287 bamaze guhabwa urukingo Doze mbere, abarenga ibihumbi 203 ni bo bamaze guhabwa Doze 2. Naho abamaze huhabwa urukingo rwo gushimangira basaga gato ibihumbi 21. Ni imibare ihinduka umunsi ku munsi bitewe n’uko gahunda y’ikingira kuri aka Karere ikomeje.
Ni mu gihe muri aka Karere hagomba gukingirwa abantu bagera kuri 299,876.
