Abaturage bo mu Karere ka Gatsibo batujwe mu Mudugudu w’Icyitegererezo wa Nyabikiri mu Murenge wa Kabarore bemeza bamaze kwikura mu bukene nyuma yo gutuzwa heza, aho banegerejwe ibikorwaremezo.
Abo MUHAZIYACU yaganiriye nabo tariki 18 Mutarama 2022 muri uyu Mudugudu wa Nyabikiri bakunze kwita uwa ‘Yerusaremu’ bahuriza ku kugaragaza ko hari impinduka nziza mu iterambere ry’imibereho yabo,
Umwe muri bo ni Kwizera Aimable ugira ati: “Ndashima Perezida wa Repubulika Paul Kagame wampaye inka ubu ndi umuntu ufite imbaraga biturutse ku buryo mbonamo amata kandi nkabona n’amafaranga, mfite inka yanjye ndakama, nkagemura impa litiro eshanu. Muri izo eshatu ndazigurisha banyishyura ibihumbi 18 FRw ku kwezi.”
Kwizera akomeza avuga ko kuba yari mu kiciro cya mbere cy’Ubudehe byatumaga ntacyo abasha kwikorera ndetse no kubona amafaranga byari ingorabahizi.
Uwikunda Vestine na we ni umuturage watujwe mu Mudugudu w’Icyitegererezo wa Nyabikiri, yemeza ko ubuzima bwe bwahindutse, ati: “Mbere nari ntunzwe n’ibyo Leta impa, baje kudutuza baduha n’aho duhinga ubu mbayeho neza ntawe nkibereye umutwaro.”
Bimwe mu byo aba baturage basabwa n’ubuyobozi bw’akarere ni ukurushaho kwishyira hamwe muri gahunda zose kugira ngo bafashanye kuzamurana mu mibereho,
Umuyobozi w’Akarere wungirije ushinzwe iterambere ry’ubukungu Sekanyange J. Léonard mu kiganiro yagiranye na Muhaziyacu ku bijyanye n’imiturire y’aba baturage,
Yagize ati “Tubasaba ko aya mazu bagomba kuyitaho kuko ni ayabo igihe hagize ishaka kwangirika, bakajya bayisana nk’uko buri muntu wese yita ku kintu cye, ko batazategereza ko akarere kaza gusana buri kintu cyose; kuko hari duto two bo bashobora kwisanira biri mu bushobozi bwabo; ibikomeye bigakorwa n’akarere”
Umudugudu w’icyitegererezo wa Nyabikiri utuwe n’imiryango 44 igizwe n’abaturage 235. Muri uyu mudugudu harimo ishuri, igikumba mursange kirimo inka 42, ivuriro n’isoko byashyiriweho gufasha aba baturage.
