Imiryango 104 yo mu Karere ka Ngoma yorojwe inka muri gahunda ya Girinka Munyarwanda kuri uyu wa Kane, abaturage bagabiwe biyemeje kwita ku nka bahawe; Ubuyobozi bubizeza kubaba hafi.
Kuri uyu Kane tariki 07 Ukwakira mu mirenge itandukanye y’Akarere ka Ngoma hari abaturage bagabiwe inka, usibye abaturage basanzwe bari mu cyiciro cya mbere n’icya kabiri bari ku rutonde rw’abagomba guhabwa inka, mu Murenge wa Mugesera hari umwe mu bagabiwe wihariye.
Ni Mbonigaba Innocent , umuturage waciwe akaboko n’abajura ubwo yajyaga kubakumira, yari umunyerondo w’umwuga gusa ubu nta kiganza cy’ibumoso agira.
Mu rwego rwo kumuba hafi no gukomeza kumufasha kwiyubakira umuryango dore ko ari umugabo ufite umugore n’abana batatu, ubwo yashyikirizwaga inka yatomboye, yagize ati: “Kuba bampaye inka nabyishimiye cyane ngiye kubona agafumbire, ikampa amata nkabona ayo mpa abana.”
Hari abandi baturage bagabiwe inka bemeza ko izi nka zizabateza imbere.
Mu muhango wo gutanga izi nka, hari inka yabyaye iza kugabirwa uwitwa Rugina Christophe, maze MUHAZIYACU iganira na we ari mu byishimo byinshi, ati: “Mu mutima nishimye cyane, ngiye kuyorora neza nkayishakamo urwunguko rurenze uru, ubu ngiye kuyijyana mu rugo dutangire kunywa amata.”
Mbere y’uko aba baturage bahabwa izi nka, ngo bigishijwe uko bagomba kuzifata neza bazitaho kandi Ubuyobozi bw’Akarere ka Ngoma buvuga ko buzakomeza kuba hafi y’aba baturage.
Umuyobozi w’Akarere ka Ngoma wungirije ushinzwe iterambere ry’ubukungu Mapambano Nyiridandi Cyriaque,
Yagize ati: “Icyo dusaba abaturage ni uko izi nka bagabiwe n’Umukuru w’Igihugu bakwiye kuzifata neza mu buryo bwose bushoboka, tubahaye inka zifite amezi zihaka zasuzumwe; nta mpamvu n’imwe yatuma zitabagirira akamaro.”
Inka zagabiwe abaturage ni 104 zifite agaciro ka mafaranga miliyoni 97,5 zije zisanga izindi 324 zo zari muri gahunda yo kwitura.
Mu Karere ka Ngoma bamaze gutanga inka 10724 muri Gahunda ya Girinka yatangiye mu mwaka wa 2006.
