Urwego rw’Igihugu rushinzwe iterambere-RDB ruherutse gusohora itangazo rikuraho ibwiriza ryo kubanza kwipimisha Covid19 ibizwi nka test kuri ba mukerarugendo baje mu Rwanda kuko Ishami ry’umuryango w’abibumbye ryita ku buzima(OMS) ryemeje ko Covid19 itakiri icyorezo cyugarije isi.
Ku rubuga rwa Twitter rwa RDB rwo ku itariki ya 25 Gicurasi 2023 ubutumwa bwashyizweho ku isaha ya saa tanu z’amanywa (11:05Am) bugaragaza neza ko nta mukerarugendo uzongera gusabwa kwipimisha Covid19.
Ubutumwa bwanditse muri aya magambo:”RDB iramenyesha abantu bose ko abakerarugendo basura pariki z’Igihugu, ubariyemo n’abana barengeje imyaka 5, batagisabwa kugaragaza icyemezo cy’uko bipimishije COVID-19. Cyakora, abasura inguge, harimo n’ingagi, bazakomeza gusabwa kuba bambaye udupfukamunwa.”
Ubwo bamwe mu banyamakuru bari mu rugaga rw’abanyamakuru barwanya Sida mu Rwanda no guharanira ubuzima-Abasirwa, bari mu karere ka Musanze aho bagaragarijwe ibyakozwe n’akarere ka Musanze mu guhangana n’icyorezo cya Covid19 abenshi bagize impungenge ku bukerarugendo mu Rwanda.
Hari byinshi byakozwe kandi bigikorwa mu kuyirwanya, abaturage bagirwa inama zo gukomeza kwirinda Covid19 dore ko hari abaturage bacyiyandura nubwo bafashwa kuvurwa, bagahabwa n’imiti ivura Covid19 mu gihe cy’iminsi itandatu ku wayifashe neza.
Umuyobozi w’Akarere ka Musanze wungirije ushinzwe imibereho myiza y’abaturage, Kamanzi Axel yagize icyo avuga ku bantu bashobora kugira impungenge z’uko hari abantu bacyandura Covid19 nyamara aka karere ari igicumbi cy’ubukerarugendo.
Yagize ati: “Musanze ni igicumbi cy’ubukerarugendo, usibye Pariki y’ibirunga ni igicumbi cy’ubukerarugendo bushingiye ku nama hano twakira ba inama nyinshi cyane, turababwira ko Covid19 ihari kugira ngo mwirinde mukurikize za ngamba zose zihari, nta mpungenge biduteye kuko abakerurugendo basura ingagi bo hari zimwe mu ngamba bubahiriza birinda kwanduza ziriya ngagi.”
Kuba ibi bitagiteje ikibazo bituruka kandi ku mabwiriza yatanzwe na OMS yemeza ko Covid19 itakiri icyorezo kibangamiye isi.
Kugeza ubu u Rwanda rufitanye amasezerano yo kwamamaza Visit Rwanda n’amakipe abiri akomeye y’i Burayi harimo ikipe ya PSG yo mu Bufaransa na Arsenal yo mu Bwongereza
Muri uyu mwaka ushize wa 2022, nk’uko bigaragazwa na raporo y’ibikorwa by’umwaka bya RDB muri 2022 igaragaza ko ibikorwa by’ubukerarugendo byose byinjirije u Rwanda Miliyoni 445 z’Amadorali y’Amerika, mu mwaka wa 2018 ibikorwa by’ubukerarugendo byinjije miliyoni 425 z’Amadorali y’Amerika naho mu mwaka wa wa 2019 hari hinjiye miliyoni 498 z’Amadorali y’Amerika, mu mwaka wa 2021 ho zari 164.
Abakerarugendo baje gusura parike z’igihugu gusa binjije miliyoni 27 z’Amadorali y’Amerika mu mwaka wa 2022 zivuye kuri miliyoni 8.1 z’Amadorali y’Amerika yari yinjiye mu mwaka wa 2021.
