Ubuyobozi bw’Akarere ka Gatsibo burakangurira abakora ibikorwa bijyanye n’ubucukuzi bwa kariyeri burimo umucanga, amabuye yo kubakisha ndetse n’ibumba, gukurikiza amabwiriza no kwirinda icyashyira ubuzima bw’abantu mu kaga, ndetse no kunoza ibyo bakora kuko iyo bikozwe neza bigira uruhare runini mu iterambere ry’Igihugu.
Byagarutswe kuri uyu wa 3 Nzeri 2026 mu nama yahuje Ubuyobozi bw’Akarere ka Gatsibo n’abakora ubucukuzi bwa Kariyeri muri aka Karere bagera kuri 65 bakorera mu mirenge itandukanye igize Akarere.
Iyi nama yahuje abagera kuri 22 bacukura umucanga, 28 bacukura amabuye yo kubakisha, ndetse na 15 bacukura ibumba.
Umuyobozi w’Akarere ka Gatsibo Gasana Richard yasabye abakora ubucukuzi bwa Kariyeri kutareba inyungu z’amafaranga gusa, ahubwo bakazirikana ko ubuzima bw’Umunyarwanda aribwo bukungu bw’Igihugu.
Yagize at: “Tugomba kwirinda ikintu cyose cyakwangiza ubuzima bw’umuturage, nk’uko gahunda y’Igihugu cyacu ari ugushyira umuturage ku isonga kuko aribwo bukungu Igihugu gifite. Ni yo mpamvu iyo hari ikigaragara ko cyahungabanya ubuzima bw’umuturage bihinduka ikibazo cy’Igihugu cyose.”
Yakomeje agira ati: “Turasaba abakora ubucukuzi kutareba inyungu zabo gusa bakura mu bucukuzi, ahubwo bakareba n’ubuzima bw’abakorera mu birombe byabo, twitsa cyane ku bakora badafite ibyangombwa tubashishikariza gushaka ibyangombwa bisabwa. Turifuza ko twagira ahakorerwa ubucukuzi hatateza ikibazo abaturage, aho ababishinzwe bazatubwira ko hashyira ubuzima bw’abaturage mu kaga tuzahafunga dushishikarize nyiraho gushaka ibyangombwa bisabwa.”
Bamwe mu bakora ubucukuzi bwa Kariyeri mu Karere ka Gatsibo banenga bagenzi babo batubahiriza amabwiriza agenga ubucukuzi bwa Kariyeri, kuko ari imirimo ishobora gutwara ubuzima bw’abantu iyo budakozwe neza.
Ndayizeye Gaddafi ukora mu bucukuzi bw’umucanga, yagize ati: “Nibyo koko nk’abacukuzi ba kariyeri hari igihe dukurikirana inyungu ugasanga tubikoreyemo amakosa, ariko nyuma yo kuganirizwa n’ubuyobozi twiyemeje kwisuzuma tugakurikiza amabwiriza nk’uko bisabwa, tunakangurira bagenzi bacu kuzirikana ko ubuzima bw’abantu dukoresha ari bwo bwa mbere, turasaba ubuyobozi gukomeza kutuba hafi no gukomeza ubukangurambaga ku bantu bari mu gice cy’ubucukuzi bwa kariyeri.”
Mu bugenzuzi bwakozwe n’Akarere ka Gatsibo ku bacukuzi 44, bwagaragaje ko abagera kuri 21 aribo bafite ibyangobwa bijyanye n’igihe, abagera kuri 14 ibyangombwa byabo byararangiye bari muri gahunda yo gushaka ibishya, naho abagera 9 ibyangombwa byabo byararangiye ntibaranatangira gushaka ibishya.
Ubu bugenzuzi kandi bwagaragaje ko abakora ubucukuzi bwa kariyeri bose mu Karere ka Gatatsibo birengagije gutanga raporo y’ibyo bakora , ndetse no kugaragaza imbago zaho bakorera, byatumye bacibwa amande agera ku bihumbi 300 Frw ku birengagije gutanga raporo ndetse n’ibihumbi 300 Frw ku bataragaragaje imbago z’aho bakorera, nk’uko biteganwa n’itegeko nimero 072/2024 ryo ku wa 26 Kamena 2024 rigenga ubucukuzi bw’amabuye y’agaciro na kariyeri mu Rwanda.
