Umukobwa wo mu Karere ka Rwamagana mu Murenge wa Kigabiro yaguye gitumo umusore bendaga gushakana ari gusambana n’undi mukobwa bituma ubukwe bwabo buhita buhagarara.
Ibi byabaye mu kwezi gushize tariki ya 13 Ukuboza, mu Murenge wa Kigabiro mu Kagari ka Cyanya. Uyu mukobwa n’uyu musore bakaba bari basanzwe bafite ubukwe tariki 20 Ukuboza 2020 buza kwigizwa inyuma kubera amabwiriza yashyizweho n’inama y’Abaminisitiri yo kwirinda icyorezo cya Covid-19.
Amakuru yizewe 100% agera kuri MUHAZIYACU yakuye mu nshuti z’aba bombi yemeza ko uyu mukobwa yafatiye mu cyuho cy’ubusambanyi uyu musore nyuma yo kumuhamagara kuri telefone akamubura ubundi agahitamo kujya kumureba aho aba.
Umwe mu baduhaye amakuru yagize ati: “Umukobwa avuga ko yamubuze kuri telefoni umwanya munini, saa sita zigeze ngo ajya kumureba iwe mu rugo kuko hari ibyo bari bagiye kujyanamo nk’abantu bitegura ubukwe, agezeyo asanga imiryango yose irarangaye arinjira afunguye kucyumba asanga umusore ari gusambana n’undi mukobwa arabyibonera n’amaso ye.”
Yakomeje avuga ko umukobwa yahise akura telefoni mu mufuka arabafotora ubundi ngo ahitamo kujya kumurega kwa pasiteri, undi nawe ngo ahita ahagarika uyu musore usanzwe uba no muri korali.
Indi nshuti y’uyu mukobwa yavuze ko umuntu babafatanye ashobora kuba ari umugore ufite umugabo gusa ngo umukobwa yirinze kubitangaza cyane mu rwego rwo kubaha uyu musore bari bamaze igihe bakundana ndetse bari bagiye kwibanira akaramata.
Undi uzi neza iby’ay’amakuru yavuze ko nyuma yo gufatirwa mu cyuho abura icyumweru kimwe ngo arongore uyu musore yitabaje bamwe mu bagabo bari barimo n’abazajya kumusabira kugira ngo bajye kumusabira imbabazi abenshi ngo baramutsembera kuko babonaga ntaho bahera basaba imbabazi.
Nyuma y’iminsi mike ibi bibaye umukobwa ngo yasubiye mu rugo rw’umuhungu amusubiza impeta yari yaramwambitse ndetse ngo anamubwira ko ibyabo byarangiye atazongera kumutekereza.
Abari ku rubuga rwa WhatsApp rutegura ubukwe ntacyo barabwirwa
Bamwe mu baganiriye na MUHAZIYACU bari ku rubuga rutegura ubukwe banashyigikiriragaho uyu musore bo ngo ntakintu na kimwe barabwirwa ngo buri gihe babwirwa ko ubukwe bwishwe na Covid-19.
Uwo twaganiriye yavuze ko nka 90% y’abantu bose bari kuri uru rubuga bamaze gutwerera ngo iyo hagize ubaza itariki ubukwe bwimuriweho bamubwira ko bazabimenyeshwa nyamara ngo abamaze kumenya amakuru bo bamaze kuruvaho.
Mu butumire uyu musore n’inkumi bari baragejeje ku nshuti zabo n’imiryango buvuga ko bari kuzakora ubukwe tariki ya 20 Ukuboza 2020 imihango yo gusaba no gukwa ikaba yari kubera muri Harmony Garden bagasezeranirana mu itorero Church of the Rock.
Bivugwa ko aba bombi bari baranamaze kwiyandikisha mu mihango yo gusezerana imbere y’amategeko mu Murenge wa Kigabiro.
