Ubuyobozi bw’Akarere ka Rwamagana buratangaza ko bwaribufite intego yo kubaka ibyumba by’amashuri 911, bimwe muri byo byamaze kuzura naho ibindi ngo bizaba byaramaze kuzura mu byumweru bibiri biri imbere.
Ibi byakozwe muri gahunda y’igihugu cyose igamije kugabanya ubucukike mu mashuri no korohereza abanyeshuri kwiga bisanzuye, ndetse no kugabanya ingendo bakora kugira ngo bagere aho bigira.
Umuyobozi w’Akarere ka Rwamagana wungirije ushinzwe imibereho y’abaturage, Umutoni Jeanne yavuze ko muri aka karere bari bafite intego yo kubaka ibyumba 912 n’ubwiherero 1,295, bakaba barabyubatse mu byiciro bibiri.
Icyiciro cya mbere cyari kigizwe n’ibyumba 98, ngo byashojwe ijana ku ijana.
Ati: “Icyiciro rero kindi turimo kubaka turacyari ku kigereranyo cya 40 ku ijana, kuko hari ahandi tugeze mu gusakara, n’ahandi tukiri munsi y’amadirishya. Ubwo rero turatekereza ko dufatanyije n’abaturage n’abayobozi twese ibyo byumva tuzabirangiza mu byumweru bibiri.”
Visi Meya Umutoni avuga ko muri gahunda yitwa Tujyanemo, abaturage batanga ubufatanye bwabo bitewe n’ubushobozi bwabo.
Ati: “Hari ahatiwe moteri y’umuriro, ni abaturage baba bazifite, tukigurira mazutu, yewe hari n’utiza imodoka kugira ngo tuzane ibikoresho bimwe na bimwe nk’umucanga n’amabuye, twe tukabigura tukigurira na lisansi. Twarafatanyije rero… Ndumva nafata uyu mwanya nkashimira abaturage bose b’aka karere.”
Abaturage barerera ku bigo bitandukanye byabonye ibyumva bishya bavuga ko abana babo bazabasha kwiga bisanzuye bakanabasha gukurikiranwa neza kubera nta mubyigano uzaba ukiri mu ishuri.
Ati: “Kubera ko babaga ari benshi mu ishuri ntabwo babitagaho uko bikwiye, ntako umwarimu yabaga atagize pe, gusa ntabwo yabaga aribugere kuri umwe ku wundi.”
Muhawenimana w’imyaka 37 yacikirije amashuri mu mwaka wa kane w’amashuri abanza, ahamya ko hari amahirwe mu kwiga abana bagomba gufashwa n’ababyeyi mu kubyaza umusaruro.
Ati: “Iyo nza gukomeza nkazamuka ubu mba ndi ahandi hatari aha, mba ntitwa umukotezi [w’amatafari] nitwa umutntu ukomeye.”
Avuga ku kibazo cy’ubucukike, Habiyaremye Etienne, ufite umwana wiga mu wa mbere n’uwiga mu kabiri we yagize ati: “Hari igihe umwana wanjye wiga muwa mbere yaje mubaza ibyo yize uwo munsi arangije ambwira ko ibyinshi atigeze abibona kubera atarebaga imbere.”
Uwitwa Mukarwego Immaculee urerera muri GS Muyumbu B mu Mudugudu wa Kanyinya, Akagari ka Ntebe, muri Muyumbu yavuze ko ubucukike mu mashuri bwari buhangayikishije, nk’umuntu uturiye ikigo akaba yarabibonye.
Ati: “Narabibonye ku bana biga hano, bacukitse, bamwe bicara hasi, abandi batira n’intebe kugira ngo abana bakunde bakwirwemo, tubona birabangamye. Ariko bazanye kwagura amashuri tubona ni byiza.”
Umuyobozi w’urwunge rw’amashuri rwa Murambi rifite abanyeshuri 1,103 mu mashuri abanza, na 266 mu yisumbuye riherereye mu Murenge wa Muhazi, Nkerabigwi Laurent, ayobora ikigo cyahawe ibyumba bishya icyenda ari ko ngo byari bikenewe cyane.
Ati: “Murabizi ko twaridufite ikibazo cy’ubucukike mu mashuri yacu, taridufite abana bagera ku 1,294 mu byumba 16 gusa. Rero kuba dufite amahirwe tukaba tubonye ibindi byumba icyenda byiyongereyeho ni byiza kuri twe, ni byiza ku gihugu , ni byiza ku karere, kuko abana bazabasha kwiga.”
Nkerabigwi avuga ko nk’ishuri ryabaga ririmo abanyeshuri 86 mu mashuri abanza byagoraga abana kwicarao kwicara urumva harimo ikibazo, naho ryisumbuye ho bari ku kigereranyo cy’abanyeshuri 66 mu ishuri.
Uyu muyobozi w’ishuri arongera ati: “Muri make aya mashuri amaze kuzura bizadufasha abana kwiga ku kigererarnyo cyemewe ku rwego rw’isi; ubundi turateganya ko ishuri rigomba kubamo abana batarenze 45.”
Mu gihe bizaba ngombwa amashuri atangira icyorezo cya Covid-19 kitaracika burundu, Nkerabigwi avuga ko ahicaraga batatu ku ntebe hazajya hicara babiri mu rwego rwo gushyiramo intera hagati y’abanyeshuri ngo batanduzanya.
