Umuyobozi w’Intara y’Iburazirazuba CG Gasana K. Emmanuel yibukije Abayobozi mu nzego z’ibanze mu Karere ka Rwamagana gufata neza abaturage ntibabahobotere kuko bose bahuje inshingano zo guteza imbere umuturage w’u Rwanda.
Ni ibikubiye mu butumwa yatangite mu nama mpuzabikorwa y’Akarere ka Rwamagana yabaye kuri uyu wa Kabiri tariki 07 Nzeri.
Ku ngingo y’uburyo abayobozi bakwiye kwitwara imbere y’abaturage yagize ati: “Hari hamaze igihe hatagaragara imikorere myiza hagati y’umuyobozi n’umuturage, bitewe wenda n’uburyo abayobozi bitwaraga cyane cyane bamwe bo mu nzego z’ibanze, iyo umuturage atabonye serivisi nziza imubereye ntabwo yishima.”
Guverineri Gasana akomeza avuga ko abayobozi bagomba kunoza imyitwarire yabo imbere y’abaturage, bagakora kinyamwuga, batanga serivisi nziza kandi ku gihe, bagakora ku buryo badatakaza igihe cy’umuturage,
Yakomeje agira ati: “Izo bomboribombori ntabwo twazishakaga, niyo mpamvu twifuje ko twahura kugira ngo tuzibe icyuho cyari gihari, twibanda ku ndangagaciro dukora kinyamwuga.”
Nyuma y’iyi nama mpuzabikorwa bamwe mu bayobozi MUHAZIYACU yavuganye nabo bavuze ko bahavanye ingamba zikomeye zo gukorana n’abaturage,
Habineza Zakayo ni umukuru w’Umudugudu wa Bitsibo mu Kagari ka Nyakabanda, Umurenge wa Musha, yagize ati: “Tuvuye hano dufashe ingamba zo kujya duhura n’abaturage, tugakora ubukangurambaga abaturage bakigishwa kandi mu buryo butabahutaza.”
Aba bayobozi bavuga ko icyo bashyize imbere ari ukuba inshuti n’abaturage bakabiyumvamo cyane kurusha uko byari bimeze ubu, kuko ngo kuba inshuti n’umuturage bifasha umuyobozi kwesa imihigo kuko imyinshi muri yo ikorwa n’abaturage cyangwa se ikorerwa abaturage.
Nsanzuhoraho Emmanuel, Umunyamabanga Nshingwabikorwa w’Akagari ka Cyanya mu Murenge wa Kigabiro na we yavuze ko kuba inshuti n’umuturage bikwiye kuba intego ya buri muyobozi.
Inama mpuzabikorwa y’Akarere ka Rwamagana iteganywa n’itegeko, iterana inshuro imwe mu mwaka, ihuza abayobozi b’inzego z’ibanze kuva ku mudugudu kugera ku karere, initabirwa kandi n’abavuga rikumvikana, abafatanyabikorwa bakorera mu karere.
