Hirya no hino mu Karere ka Rwamagana, kuri iki Cyumweru hakozwe siporo rusange ikorwa inshuro ebyiri mu kwezi, ku rwego rw’akarere abayitabiriye bo mu mujyi wa Rwamagana baturutse mu mirenge ya Muhazi na Kigabiro basabwe kurushaho gukora siporo bimakaza isuku; banayishikariza abandi.
Umuyobozi w’Imirimo rusange mu Karere ka Rwamagana Hagenimana Jean Damascène, yibukije abaturage bitabiriye iyi siporo ko nta muntu n’umwe uhejwe mu gukora siporo, yaba abato n’abakuru kuko siporo ari ingirakamaro mu buzima bwa muntu,
yakomeje agira ati: “Gukora siporo kandi ugakora iyo ushoboye bifasha ubuzima, ikindi ni uko Siporo ari ubuzima kandi ubuzima bwiza kandi buzima ntibusigana n’isuku.”
Yavuze kandi ko kubungabunga ubuzima bigomba kujyana n’imirire myiza, ndetse ko gukora siporo abantu bagira isuku, bizatuma Abanyarwanda barushaho kubaho neza biyubakira Igihugu bafite ubuzima buzima.
