Perezida wa Repubulika y’u Rwanda, Kagame Paul ubwo yagezaga ijambo ku bitabiriye ibirori byo kurahira kwe ku kuyobora u Rwanda muri manda nshya y’imyaka itanu iri mbere, yavuze ko amahoro yo mu Karere ari ingenzi ku Rwanda ndetse ko ibihugu by’ibihangange bidakwiye gutegeka abandi uko babaho cyangwa se ngo bagoreke ukuri.
Kagame Paul, yagize ati: “Muri iyi myaka 30 ishize, Abanyarwanda twageze kuri byinshi birenze n’ibyo twatekerezaga ko bishoboka no ku bivuga mu magambo ntabwo bishoboka urebye aho twaturutse, amateka yacu mabi yakongeje muri buri wese, ikibatsi cy’icyizere no kudacogora no guharanira ubutabera duca akarengane. Uyu munsi abo nibo banyarwanda turi bo.”
Akomeza agira ati: “Muri uyu mwaka wa 2024, ibibazo n’amakimbirane biri mu
Karere kacu n’Isi muri rusange bikomeje gutera impagarara no kutizerana bituruka mu kudakemura ibibazo by’uburyarya no kudashyira mu gaciro, amahoro mu Karere turimo ahora ku isonga mu byo u Rwanda rushyira imbere ariko akomeje kubura cyane cyane mu Burasirazuba bwa Congo.”
“Amahoro ariko ntabwo yazanwa n’uturutse aho ariho hose nubwo yaba ari igihangange ntacyo byatanga uruhande rumwe rufite uruhare runini mu kugarura amahoro rutagize icyo rubikoraho, ibyo bitabayeho Abayobozi b’Ibihugu byo mu Karere bagerageje guhuza impande zombi ntabwo bagera kubyo basabwe.”
Perezida Kagame yashimiye Abaperezida barimo uw’Igihugu cya Angola n’uw’icya Kenya ku byo bakoze byose kandi bagikomeje gukora mu kugarura amahoro.
Yongeye ati: “Amahoro abaho ariko ntabwo yizana, tugomba twese kugira uruhare rwacu no gukora ibikwiye kugira ngo tuyabone kandi mu buryo burambye, gukora ibishoboka kugira ngo tubone amahoro ntabwo bikwiye kugaragara nk’aho hari icyo dusaba abandi, bikwiye kumvikana ko ari ngombwa ko ari ikibazo cy’uburenganzira bw’abantu kandi ntabwo amahoro nyayo yaboneka butubahirijwe.”
Yavuze ko ibihugu by’ibihangange bidakwiye gutegeka abandi uko babaho cyangwa se ngo bagoreke ukuri, ko ahubwo bikwiye kurwanya nubwo byaba biri ku gitutu kandi ko nta karengane bakemera aho kaba kabera hose.
Yongeyeho ko nk’abanyafurika barwanyije akarengane guhera cyera kandi ko nta masomo bakeneye y’uko bagomba kubikora.
Yasoje agira ati: “Icyangombwa kandi cy’ingenzi ni uko abaturage bacu babaho mu mutekano, bagira ubuzima bwiza kandi bubahesha agaciro, iri ni ihame kandi rikaba n’inshingano tutakwirengagiza nta n’undi wabidukorera.”
