Hirya no hino mu gihugu hakunze kugaragara abatwaye imitwaro ku magare, abantu bakagira ngo ni imvune gusa ntakivamo. Siko bimeze kuko Niyizigiye Jean Marie Vianney ubu yubatse inzu akaba anafite umugore byose abikesha gutwara umuceri usarurirwa mu gishanga cy’Umuvumba giherereye mu Karere ka Nyagatare.
Niyizigiye avuga ko yatangiye asunikira abantu batwaye imitwaro ku igare bakamuha amafaranga ariyo yaje guteranya akaguramo igare akoresha ubu.
Ati”Natangiye nsunikira abantu batwaraga imitwaro ku igare hepfo y’iwacu bakampa igiceri cy’ijana, nateranyije ayo amafaranga agwiriye ndangura ibisheke ndabicuruza ngize ibihumbi 20 frw njyana na papa angurira igare.”
Yakomeje avuga ko akimara kubona igare yatangiye gutwara umuceri usarurirwa muri icyo gishanga aza kuhakura amafaranga ibihumbi 50 Frw yaguzemo ikibanza anubakamo inzu nto, kuri ubu akaba yaranashakiyemo umugore mu mwaka ushize, nibura umutwaro umwe awutwarira 300 Frw.
Si Niyizigiye gusa witeje imbere akagura igare kuko hari n’urundi rubyiruko rwagiye rworora inkwavu rukabasha kugura amagare.
Umuyobozi w’Akarere ka Nyagatare Gasana Stephen arashimira uru rubyiruko rwiteje imbere rugakoresha amahirwe ari iwabo ari nako ashishikariza abatarabikora kubikora kuko bishoboka.
Ati”Ni byiza kuba urwo rubyiruko rwararebye amahirwe ari iwabo muri kiriya gishanga cy’umuvumba gisarurwamo amatoni menshi y’umuceri noneho bakabona ko hakenewe ubwikorezi. Ubwo rero icyo twasaba urundi rubyiruko ni ukugenda bareba amahirwe ari iwabo aba bafatiye ku buhinzi bw’umuceri, hari abafatira ku bw’ibigori.”
Mu Karere ka Nyagatare habarurwa urubyiruko 177 981 kakaba Akarere ka kabiri gafite umubare munini warwo mu gihugu nyuma y’Akarere ka Gasabo nkuko ibarura rusange rya 5 ryabigaragaje.
