Urukiko rw’Ibanze rwa Nyarugenge rwategetse ko Shema Ngoga Fabrice afungurwa, nyuma yo kwemera amasezerano y’ubwumvikane yari yagiranye n’Ubushinjacyaha. Icyemezo cyafashwe kuri uyu wa Kabiri, tariki ya 22 Nzeri 2026, nyuma y’uko ku munsi wabanje impande zombi zumvikanye ku buryo urubanza rwe rukemurwamo.
Shema Fabrice yemeye ibyaha bibiri yari akurikiranweho. Harimo gutanga sheki itazigamiwe, ndetse no kwihesha ikintu cy’undi hakoreshejwe uburiganya.
Inkuru yabanje: RIB yataye muri yombi Shema Ngoga Fabrice, Perezida wa FERWAFA
Ibi byaha byakomotse ku sheki ebyiri yari yatanze zifite agaciro k’Amadolari 600,000, mu kwishyura ibyo kompanyi ye, Africa Medical Supplier, yagombaga gutanga hashingiwe ku masezerano yari ifitanye na ABZL International General Trading LLC yo muri Leta Zunze Ubumwe z’Abarabu.
Mu masezerano y’ubwumvikane yashyikirijwe Urukiko, Ubushinjacyaha bwagaragaje ko Shema Fabrice yari amaze kwishyura amafaranga yari asanzwe ategerejweho.
Ubushinjacyaha bwasabye ko ahanishwa igifungo cy’amezi atandatu gisubitswe mu gihe cy’umwaka umwe, ndetse n’ihazabu ya miliyoni eshatu z’amafaranga y’u Rwanda.
Urukiko rwemeje ibyo byifuzo, ruhanishiriza Shema Fabrice igifungo cy’amezi atandatu gisubitswe mu gihe cy’umwaka umwe, hamwe n’ihazabu ya miliyoni 3 Frw.
Urukiko kandi rwategetse ko amasezerano y’ubwumvikane atangira gukurikizwa ako kanya nyuma y’isomwa ry’icyemezo, bituma Shema Fabrice arekurwa.
Icyemezo cyafashwe mu gihe yari asanzwe yarajuriye mu Rukiko Rwisumbuye rwa Nyarugenge, asaba ko hafatwa icyemezo ku ifungwa n’ifungurwa ry’agateganyo mu gihe cy’iminsi 30.
