Abaturage baturiye ishyamba ry’Imikinga ribagabanya u Rwanda na Uganda, riherereye mu Murenge wa Rwempasha, bafite imbogamizi zo kuba bamaze igihe kirekire n’inkende ziva muri iryo shyamba zikajya kubonera imyaka yabo mu mirima, bikabateza igihombo gikomeye.
Bamwe mu baturage bavuga ko izo nyamaswa zibonera imyaka yabo irimo ibigori, ibishyimbo n’ibitoki, ku buryo hari n’abamaze gucika intege zo kongera guhinga hafi y’ishyamba.
Nzigiye Dionisio, umwe mu baturage bahinga hafi y’iryo shyamba, avuga ko ikibazo kimaze gufata indi ntera, ati: “Twahinze dutegereje umusaruro, ariko inkende ziturutse mu ishyamba ry’Imikinga ziradutera zikangiza imyaka yose. Hari aho dusarura bike cyane cyangwa ntitubone icyo tweza na gato.”
Undi muturage witwa na we avuga ko nubwo bagerageje kwirinda bahinga kure y’ishyamba, inkende zigera no mu mirima iri kure, bitewe n’uko ziba zisanzwe zibona ibyo kurya byoroshye.
Ati: “Turasaba ubuyobozi kudufasha kubona igisubizo kirambye, kuko guhora turinda imirima amanywa n’ijoro biraduhangayikishije.”
Ku ruhande rw’ubuyobozi bw’Akarere, bavuga ko ikibazo kigomba gukemurwa hubahirijwe amategeko arengera ibidukikije n’inyamaswa.
Umuyobozi w’Akarere ka Nyagatare wungirije ushinzwe iterambere ry’ubukungu, Matsiko Gonzague, yasobanuye ko bitemewe kwica izo nyamaswa, kuko ishyamba ari iwabo, ariko anasaba abaturage kubahiriza imbago zaryo.
Yagize ati: “Impamvu nyamukuru ituma inkende zibonera ni uko hari abaturage bazisagarira bakazitemera ibiti, ndetse bagahinga basatira ishyamba ryazo kandi bitanemewe. Iyo ishyamba risagariwe, inyamaswa zibura aho zibona ibyo kurya bigahinduka ikibazo ku baturage kuko zirisohokamo, zikajya kubishaka hanze yaryo.”
Visi Meya Matsiko yakomeje avuga ko nubwo inkende zitemerewe konera abaturage, igisubizo kirambye ari ukubungabunga ishyamba no kutarisatira mu bikorwa by’ubuhinzi, ati: “Iyo abaturage batagisagararira ishyamba kandi bakubahiriza amategeko, n’izo nyamaswa ntizibona impamvu yo gusohoka zijya mu mirima yabo.”
Ubuyobozi bw’Akarere buvuga ko buzakomeza gukorana n’inzego zishinzwe kurengera ibidukikije n’abaturage, hagamijwe gushaka ibisubizo birambye byafasha abaturage gukomeza ubuhinzi bwabo batabangamiwe, mu gihe banabungabunga umutungo kamere w’Igihugu.
