Ubuyobozi bw’Umurenge wa Rwimiyaga uherereye mu Karere ka Nyagatare, bufatanyije n’inzego z’umutekano, imbere y’abaturage bahameneye litiro 450 z’inzoga y’inkorano itemewe yitwa Karahiye, izwiho kwangiza ubuzima bw’abayinywa.
Ubuyobozi buvuga ko karahiye ari inzoga yengwa hifashishijwe agatobe gakeya k’ibitoki ubundi bakavangwamo ibindi bintu bitazwi bishobora kwangiza ubuzima bw’uyinyweye.
Abaturage baganiriye na MUHAZIYACU bavuga ko abanyoye iyi nzoga bagaragarwaho n’urugomo rukabije kubera ibyo iyi nzoga ikozwemo.
Murwanashyaka Moses avuga ko ibiyobyabwenge n’inzoga z’inkorano bikomeje kwangiza urubyiruko ndetse ko bituma ntacyo bakora.
Yagize ati”inzoga z’inkorano n’ibiyobyabwenge bishajije urubyiruko kuko bituma ntacyo twikorera, turasaba abayobozi b’inzego z’ibanze kudufasha bakabirwanya naho ubundi bishajije urubyiruko”
Umubyeyi witwa Mukarugwiza Speciose we avuga ko ibiyobyabwenge n’inzoga z’inkorano bikomeje kongera urugomo kuko umuntu muhura yasinze akagukubita ntakuvuze kandi wowe utananywa inzoga.
Yagize ati” urugomo rukomeje kwiyongera urahura n’umuntu yasinze akagukubita ntakuvuze kandi wowe utananywa bikakuyobera”
Umunyamabanga Nshingwabikorwa w’umurenge wa Rwimiyaga, Bagabo Anthony yasabye abaturage gutandukana no gukoresha ibiyobyabwenge ndetse no kunywa inzoga z’inkorano kuko byangiza ubuzima bwabo, yavuze ko banashyize imbaraga mu kubirwanya.
Yagize ati” ububi bw’ibiyobyabwenge mwese murabizi, ababinyweye barangwa n’urugomo, inzoga z’inkorano zitemewe zo abazinyweye usanga ubuzima bwabo buri mukaga, kubera ibizikorwamo biba bitujuje ubuziranenge, ugasanga babyimbye amatama, amaguru no kurwara umwijima, niyo mpamvu twahagurukiye kubirwanya”
Umurenge wa Rwimiyaga ukomeje kurwanya ibiyobyabwenge n’inzoga z’inkorano, aho wanashyizeho imboni ku mupaka uhuza u Rwanda n’igihugu cya Tanzaniya mu rwego rwo gukumira ibiyobyabwenge na magendu byakwinjira mu gihugu. Ni mu gihe kandi ubuyobozi bw’uyu murenge bukomeje kwigisha abaturage kubyirinda.
