Ikigo cy’Igihugu gishinzwe Ubutaka n’umuryango wa Landesa bashyikirije ubuyobozi bw’Akarere ka Nyagatare, ibyangombwa by’ubutaka birenga ibihumbi 28 by’abaturage byakosorewe imbibi ndetse n’andi masambu mashya nyuma y’umwaka bari gufasha aka Karere gukemura iki kibazo.
Ni mu gikorwa cyabaye mu mpera z’iki Cyumweru aho umuryango wa Landesa wamurikiraga Akarere ka Nyagatare bimwe mu byo wakoze mubijyanye no kwandika ubutaka butari bwanditswe ndetse no gukosorera imbibi z’ubutaka abaturage bari bafite iki kibazo.
Landesa yagaragaje ko yabashije gukosora ibyangombwa 28.625 ariko ko ibyangombwa bimaze guhabwa abaturage ari 22.994 ibindi byangombwa 5.714 bikirimo ibibazo birimo ibyangombwa by’ubutaka bwa Leta bwahawe abaturage ndetse n’ubutaka bw’abaturage Leta yatujeho abandi baturage ariko ntihagaragare ibyemeza ko Leta yabuguze.
Umuyobozi wa Landesa mu Rwanda Pottel Josam, yavuze ko bishimira serivisi batanze muri aka Karere asaba ubuyobozi bwabo gukomereza aho bari bagejeje no gushaka ibyatuma aya masambu arenga 5000 ba nyirayo babasha kuyandikwaho.
Ati “ Ibyangombwa tutatanze ni imidugudu twasanze Akarere karatuje abaturage ariko ubutaka butarafatirwa umwanzuro, hari aho usanga ubutaka bwanditswe ku muntu wahoze abutunze kera, bakatubwira ko Akarere uwo muntu kabumuguriye cyangwa kamuhaye ingurane, icyo gihe rero mu buryo bw’amategeko bisaba ko habaho ihererekanyaburenganzira hagati y’uwari utunze ubutaka mbere n’Akarere.’’
Umubitsi w’Inyandiko mpamo z’ubutaka mu Ntara y’Iburasirazuba, Jean Claude Tuyisenge, yavuzeko bazakomeza rakomeza gukorana n’Akarere mu gufasha abaturage kubona ibyangombwa batahawe na Landesa ndetse no kwegeranya amakuru ashoboka kugira ngo buri wese abashe kubona ubutaka bwe.
Ati “Akarere katugaragariza ko hariya hantu hagiye himurwa abaturage ku bw’inyungu rusange rero tugiye gushaka izo nyandiko na bariya baturage bahatujwe dushake uko babona ibyangombwa.’’
Umuryango wa Landesa wafashije uturere dutatu two mu Ntara y’Iburasirazuba gukemura ibibazo byo gukosora imbibi no kwandika ubutaka butari bwaranditswe aho amasambu 87.567 ariyo yapimwe.
