Ku mugoroba wo kuwa kane tariki 14 Mutarama mu Murenge wa Tabagwe mu Karere ka Nyagatare, itsinda ry’abajura baturutse ku ruhande rwo muri Uganda ryibye inka umunani n’ihene eshatu mu rwuri rwegereye umupaka w’iki gihugu.
Izi nka n’ihene byibwe ni iby’abantu batanu, umworozi umwe muri bo yibwe inka ishanu, batatu bibwa inka imwe imwe, ihene eshatu zari iz’undi umwe.
Abaje kwiba ngo bari bayobowe n’umugande witwa Side, ngo bamanutse basanga inka aho zari ziragiwe ku musozi muri 50 uturutse aho umupaka w’u Rwanda na Uganda uherereye mu Kagari ka Gishuro mu Mudugudu wa Nyagatare, ngo babanje kwirukankana abashumba bari baziragiye barahunga.
Umunyamabanga nshingwabikorwa w’Umurenge wa Tabagwe Munyangabo Celestin, yabwiye MUHAZIYACU ko atari ubwa mbere haba hari abambutse umupaka baje kwiba inka, ngo iyo bigenze gutyo inzego z’ubuyobozi ziragikurikirana.
Yagize ati “Tugerageza kuvugana n’abayobozi bo hakurya, zaboneka zikabasha kugarurwa. Ubu turacyakurikirana nyine, kubera ko zaraye zibuze nimugoroba, turacyakurikirana kugira ngo turebe aho zagiye.”
Nk’ubutumwa ku borozi cyane cyane abegereye umupaka, umuyobozi w’Umurenge wa Tabagwe yavuze ko aborozi nabo bakwiye gushyiramo uruhare mu kurindira umutekano amatungo yabo no kwirinda kuzishyira ahantu hashobora kuba havuka ikibazo.
Amakuru kuri uyu mugande Side wari kumwe n’abandi bajura ngo nuko ari mu kigero cy’imyaka 25, atuye ahitwa muri Gahondo, Maziba mu Karere ka Kabare. Binavugwa ko aherutse kuza kwiba inka mu Rwanda tariki 20 Ukuboza 2020 ariko icyo gihe barazimutesheje.
