Ubuyobozi bw’ Akarere ka Nyagatare bwakiriye mu muryango Nyarwanda abaturage batatu bakomoka mu gihugu cya Uganda bahawe ubwenegihugu bw’u Rwanda, nyuma yo kuzuza ibisabwa byose biteganywa n’amategeko.
Aba bahawe ubwenegihugu bw’u Rwanda ni Julius Twizeye, Omodinga Lucious na Gasa Valens, bakaba batangaje ko bishimiye cyane iyi ntambwe ikomeye bagize, banashimira Leta y’u Rwanda yabemereye kuba Abanyarwanda byemewe n’amategeko.
Ni muhango wayobowe n’Umuyobozi w’Akarere ka Nyagatare w’agateganyo, Kakooza Henry, ari na we wakiriye indahiro zabo ku mugaragaro.
Meya Kakooza yabahaye ikaze mu muryango nyarwanda, abashimira icyizere bagiriye u Rwanda, abasaba gukomeza kubana neza n’abandi baturage no kugira uruhare mu iterambere ry’igihugu.
Yabibukije kandi ko ubwenegihugu ari ishema ariko kandi bukajyana n’inshingano, gukurikiza amategeko y’u Rwanda, kurangwa n’indangagaciro nyarwanda zirimo ubunyangamugayo, ubumwe, gukunda umurimo n’igihugu.
Yagize ati: “U Rwanda ni igihugu cyakira abantu bose bakifuza kubana n’abandi mu mahoro no mu bumwe. Turabishimiye nk’Akarere ka Nyagatare, tubasabye kurangwa n’indangagaciro nyarwanda no gukomeza kubaha amategeko y’igihugu cyabemeye kuba abana bacyo.”
Aba bahawe ubwenegihugu, Julius Twizeye, Omodinga Lucious na Gasa Valens, bagaragaje ibyishimo bidasanzwe, bavuga ko u Rwanda babonamo Igihugu gifite umutekano, ubuyobozi bwiza n’amahirwe yo kwiteza imbere.
Bavuze ko bagiye gukomeza kuba urugero rwiza rw’abaturage bubaha amategeko, bagatanga umusanzu wabo mu iterambere ry’igihugu n’iry’Akarere ka Nyagatare by’umwihariko.
Bagize bati: “Twishimiye cyane kuba Abanyarwanda. U Rwanda twaruhisemo kubera amahoro, iterambere n’ubuyobozi bwiza. Tugiye kurangwa n’indangagaciro nyarwanda no gutanga umusanzu wacu mu kubaka igihugu cyatwakiriye.”
Ubwenegihugu mu Rwanda butangwa hashingiye ku Itegeko ngenga rigenga ubwenegihugu mu Rwanda: N° 002/2021.OL ryo ku wa 16/07/2021. Iri tegeko rigena uburyo bwo gusaba, gutanga, gukura, no gusubirana ubwenegihugu Nyarwanda, rikaba ryarasimbuye iryo muri 2008.
