Minisitiri w’ubutegetsi bw’igihugu Gatabazi Jean Marie Vianney yibukije abaturage bo mu karere ka Bugesera gukomeza gusigasira ibyagezweho mu bumwe n’ubudaheranwa bw’abanyarwanda abasaba gukomeza kuzirikana ko ubunyarwanda ariyo sano muzi kandi ko bakwiye gushimangira ubumwe bwabo.
Ibi Minisitiri Gatabazi yabigarutseho kuri uyu wa mbere tariki ya 03 Ukwakira 2022, ubwo yatangirizaga Ukwezi k’Ubumwe n’Ubudaheranwa mu karere ka Bugesera mu Murenge wa Mayange.
Agaruka ku ntambwe abanyarwanda bamaze gutera mu rugendo rw’ubumwe n’ubudaheranwa, Minisitiri Gatabazi yavuze ko imiyoborere myiza y’igihugu yafashije abanyarwanda kutaba imbata y’amateka mabi.
Ati: “Uyu munsi, imiyoborere myiza yafashije abanyarwanda kutaba imbata y’amateka mabi. Ibiganiro byo mu Rugwiro byahaye umurongo imiyoborere u Rwanda rugenderaho uyu munsi banongera kubakira ku ndangagaciro remezo z’abanyarwanda. Muri uyu mwaka, uku kwezi kose kwahariwe kuzirikana ubumwe n’ubudaheranwa, ibikorwa byose muzakora muzakomeze gusigasira ibyagezweho. Ubunyarwanda niyo sano muzi, magara ntunsige. Twese turi umwe, ntimukemere igisenya ubumwe n’isano muzi y’ubunyarwanda.”
Umuyobozi w’Akarere ka Bugesera Mutabazi Richard yagaragaje ko abatuye aka karere bazi neza amateka kanyuzemo, yongeraho ko hari intambwe imaze guterwa mu rugendo rw’ubumwe n’ubudaheranwa.
Ati: “Iyo bavuze ubumwe n’ubudaheranwa nk’abaturage ba Bugesera tubyumva vuba, cyane ko ari Akarere kashegeshwe n’amateka igihe kirekire ariko hakaba intambwe igaragara imaze guterwa mu bumwe no kurenga ibikomere by’ayo mateka.”
Mu buhamya bwa Niyonagira Laurence warokotse Jenoside yakorewe Abatutsi muri 1994 utuye mu Mudugudu w’ubumwe n’ubwiyunge wa Rwimikoni II yagarutse ku rugendo rwo kwiyubaka nyuma yo gutanga imbabazi abamwiciye umuryango.
Ati: “Nyuma yo guca mu mateka akomeye akansigira ibikomere biremereye, habayeho kugira ubuyobozi bwiza buduha ikizere cyo kubaho kandi twigishwa gutanga imbabazi ku baduhemukiye. Mu by’ukuri ubu dufite ubuzima kandi twashoboye kugera ku bumwe n’ubwiyunge kuko uyu munsi tubana mu mudugudu n’abantu bagize uruhare mu kwica abavandimwe, ababyeyi ndetse n’inshuti zacu. Ubu tumaze kwiyubaka kuko twahisemo kuba umwe kandi twanze guheranwa n’amateka mabi yaranze igihugu cyacu.”
Muri uku kwezi k’ubumwe n’umudaheranwa, mu karere ka Bugesera hazakorwamo ibikorwa birimo gutanga ibiganiro bya ‘Ndi Umunyarwanda’ mu rubyiruko rutiga, gutoranya abarinzi b’igihango, kurangiza imanza zaciwe n’inkiko Gacaca, gutangiza ihuriro ry’urubyiruko ruharanira ubumwe n’ubwiyunge ku rwego rw’Akarere.
Insanganyamatsiko y’uku kwezi k’ubumwe n’ubudaheranwa igira iti: “Uruhare rwa buri munyarwanda mu kwimakaza ubumwe n’ubudaheranwa bw’abanyarwanda.”
