Ubuyobozi bw’Akarere ka Gatsibo bugira inama abagabo kujya bagaragaza ihohoterwa bakorerwa n’abagore babo, kubera ko kurihisha bigira ingaruka zikomeye harimo no kwicana hagati y’abashakanye.
Ni nyuma y’uko bamwe mu baturage baganiriye n’umunyamakuru wa MUHAZI YACU, bavuga ko nta mugabo wahohoterwa n’umugore we ngo ajye kumurega. Bagaragaza ko umugabo urega umugore we ngo yamuhohoteye, byaba ari igisebo kuri we.
Byukusenge Denyse utuye mu Murenge wa Kabarore, yagize ati: “Umugabo yanga ko bamuseka. Ese ubu wowe wabonye aho umugabo ajya kurega umugore ngo yampohoteye? Umugabo kugenda avuga ngo umugore yankoreye ibi n’ibi, ni ibintu bisebeje.”
Ndimubahire Jean Claude, avuga ko aho kugira ngo ajye kurega umugore ko amuhohotera ahubwo yahitamo kumuhunga akigendera.
Agaragaza ko kurega umugore ngo araguhohotera ari ibintu bigayitse.
Ati: “Umugore ankoreye ihohoterwa aho kugira ngo njye kumurega, namuhunga nkigendera. Twaba dufitanye abana nkamumenyera ibibatunga gusa.”
Nishimwe Christina Tijara avuga ko iyo umugabo areze umugore ko yamuhohoteye birangira ari we ubaye umunyamakosa.
Ati: “Umugabo hari igihe atinya kujya kurega umugore we kubera ko n’iyo yaba ari mu kuri, birangira bamugize umunyamafuti, kubera basigaye barengera abagore cyane .”
Umuyobozi w’Akarere ka Gatsibo wungirije ushinzwe iterambere ry’Ubukungu, Sekanyange Jean Leonard, avuga ko abagabo nabo bakwiye kujya babohoka bakageza ku nzego bireba ihohoterwa bakorerwa. Yemeza ko kandi igisubizo atari uguta urugo.
Yagize ati: “Nta mugabo ukwiye guhohoterwa ngo aceceke, ni ikintu kibi cyane. Abenshi iyo babicecetse, bituma hagera igihe akaba yagira nabi, kubera ko yahohotewe agaceceka. Ikindi kandi ntabwo igisubizo ari uguhunga urugo.”
Sekanyange yakomeje avuga ko niba umwe mu bashakanye akorerwa ihohoterwa, akwiye kwegera abavandimwe byananirana, bakajya mu buyobozi.
Ati: “Ibyiza niba ubona uhohotewe ugomba kubigaragaza. Mwegera inshuti z’umuryango, byakomeza kunanirana, ubuyobozi burahari. Wibyihererana ngo bikubyimbe mu mutima, ejo cyangwa ejo bundi usange birasandaye havuyemo ikibi. Niba wowe mugabo uhohoterwa egera abantu babafashe bikemuke.”
Kuva mu 1990 u Rwanda rwifatanya n’ibindi bihugu mu gihe cy’iminsi 16 y’umwihariko yahariwe kurwanya ihohoterwa rishingiye ku gitsina.
Raporo ya 2021-2022 ya Minisiteri y’Uburinganire n’Iterambere ry’Umuryango mu Rwanda, igaragaza ko abagore 233 bangana na 98% bagejeje ibirego byabo muri Isange One Stop Center ziri hirya no hino mu Gihugu bavuga ko bakorewe ihohoterwa, bahawe ubufasha kandi ibibazo byabo bigakurikiranwa; mu gihe muri uwo mwaka habonetse ibirego bine bingana na 2% by’abagabo gusa.
