Ku bufatanye bw’Akarere ka Bugesera n’umushinga uteza imbere uburezi (IEE) hatanzwe mudasobwa zigendanwa ku banyeshuri 41 bo mu Karere ka Bugesera babonye amanota meza kurusha abandi, kugira ngo bafashe abanyeshuri bafite intege nke mu masomo no kunganira abarimu mu bigo bimwe na bimwe muri gahunda ya ‘Teaching Assistantship’.
Igikorwa cyo gutanga izi mudasobwa cyayobowe n’Umuyobozi w’Ishami ry’Uburezi mu Karere ka Bugesera, Gashumba Jacques kuri uyu wa Gatatu tariki 11 Ukuboza 2024.
Gashumba Jacques yashimiye Umufatanyabikorwa-IEE(Inspire Educate and Empower Rwanda) ku nkunga yo gufasha abanyeshuri basoje amashuri yisumbuye kugira ngo na bo batange umusanzu wo gufasha bagenzi babo bakiri ku ntebe y’ishuri.
Yagize ati: “Turashimira IEE ku ruhare rwabo mu guteza imbere uburezi mu Karere kacu. Uburezi bufite ireme nibwo twifuza twese. Uruhare rwa IEE ni ingenzi mu mashuri yacu. Rero turabasaba abo twazihaye kuzifata neza bakazibyaza umusaruro.”
Tuyisabe Jessica wahawe mudasobwa yagize ati: “Izi mudasobwa duhawe zigiye kudufasha kunganira abarimu mu kwigisha abanyeshuri. Mu by’ukuri, njye na bagenzi banjye tuzakora neza inshingano zo gufasha abarimu kugira ngo nabo bagire imitsindire myiza.”
Cyuzuzo Innocente na we ari mu bahawe mudasobwa yagize ati: “Kuba baduhaye imashini, ni ikintu gikomeye kuko izamfasha gushakashaka kugira ngo mbashe kwigisha neza.”
Niyonsaba Peace, Umukozi w’Umushinga IEE ushinzwe guhugura abanyeshuri batoranyijwe kugira ngo bifashishwe mu kunganira abarimu, hagamijwe kuzamura imitsindire y’abanyeshuri bafite imbaraga nkeya mu masomo, asobanura ko iyi gahunda yo kunganira abarimu mu myigishirize itanga umusaruro ku mitsindire y’abanyeshuri.
Ati: “Iyi gahunda ya Teaching Assistantship imaze kugaragaza neza ko ibigo byagize amahirwe yo kubona bene aba banyeshuri, byazamuye imitsindire y’abanyeshuri babo kuko baba bafite ubumenyi buhagije bwo gusangiza ubumenyi bagenzi babo.”
Kugeza ubu, umushinga IEE umaze kugira abanyeshuri bunganira abarimu, barenga 700 bamaze kwifashishwa mu kunganira abarimu mu bigo by’amashuri hirya no hino mu Gihugu.
