Niyigaba Ibrahim Papa uvuka mu Karere ka Rwamagana mu gace ka Buswayilini wamenyekanye mu Rwanda ubwo yakiniraga ikipe ya Police FC yitabye Imana, nyuma yo kubura amaraso mu mubiri imisokoro ye bagasanga yarangiritse.
Uyu mukinnyi w’imyaka 26 y’amavuko yitabye Imana mu ijoro ryo kuri uyu wa 27 Werurwe 2020 nyuma y’igihe kigera ku mezi atatu arwariye mu Bitaro bya Rwamagana.
Uwiragiye Zamuda ubyara uyu musore yabwiye Muhaziyacu.rw ko umuhungu we yazize kubura amaraso mu mubiri byaterwaga nuko imisokoro ye yari yaragize ikibazo.
Yagize ati “ Yafashwe ari i Kigali baraduhamagara ngo ari mu Bitaro bya Kagugu, umukwe wanjye ajyayo ajya kumuzana yarari muri koma. Yari arwaye indwara yo kubura amaraso, twakoreshaga ibizami kenshi bagasanga ni zeru. Twanagiye CHUK bakora ibizami byose basanga yabuze imisokoro kandi ngo ni yo ikora amaraso.”
Niyigaba Ibrahim Papa yari umwana wa karindwi mu muryango w’abana umunani.
Yamenyekanye cyane ubwo yakinaga mu ikipe ya Rwamagana City mu cyiciro cya kabiri, nyuma yakiniye amakipe arimo Gasabo United yavuyemo yerekeza muri Police FC.
Ikipe ya Police FC yayikiniye muri season (sezo) ya 2016-2018.
