Ubuyobozi bw’Akarere ka Ngoma busaba abaturage kwirinda kwishora mu mazi nta myambaro y’ubwirinzi bafite kubera ko bigira ingaruka ku buzima bwabo, kuko hari abo birangira barohamye bakabura ubuzima.
Ni nyuma y’uko kuri uyu wa 09 Mata 2026, umugabo uri mu kigero cy’imyaka 36 y’ubukuru witwaga Bayingana Narcisse umurambo we wabonetse nyuma yo kujya koga mu kiyaga cya Birira yarangiza agafatwa n’umutego, koga bikamunanira bikarangira apfuye.
Bivugwa ko uyu Bayingana, yavuye murugo ari kumwe n’umwana we w’umuhungu bagiye kuvoma amazi, bagezeyo asaba umwana we ko babanza bakajya mu mazi bakoga.
Bamaze koga, aho gufata ibivomesho byabo ngo batahe, ahubwo yahisemo kubwira umuhungu we ngo afate ibivomesho atambike undi na we ngo anyure mu mazi yoga, aza gufatwa mu mitego ari muri urwo rugendo kugeza amazi amwishe, umurambo we uza kuboneka kuri uyu wa 09 Mata 2026, aho yahise arohorwa akajyanwa ku bitaro bya kabiri byigisha bya kibungo ngo umurambo we ukorerwe isuzumwa.
Umunyamabanga Nshingwabikorwa w’Umurenge wa Rukumberi, Nshimiyimana Jean Pièrre yemeje iby’aya makuru asaba abaturage kwirinda kujya mu mazi badafite uburyo bw’ubwirinzi.
Yagize ati: “Nibyo koko uyu muturage yarohamye mu mazi, hari amajerekani bigaragara ko yari yaje kuvoma, ubu rero umurambo we wajyanwe gukorerwa isuzuma.”
Ubuyobozi bukangurira abaturage kwirinda kujya mu mazi batambaye imyenda ibarinda kurohama.
